Vera tecrîdê serê Rayberê Şarê Kurdî Abdullah Ocalanî de heme welat û hem zî Ewropa de xeylê cayan de çalakîyê şermizarkerdişî ameyî viraştene. Qezaya Qoserî ya Mêrdînî de bi wesîleya Aşma Remezanî Sifreyê Rîyê Erdî ame ronayene û fitar ra dima zî çalakîya roniştişî ameye viraştene.
Sifre Parka Mehmet Sîncarî de ronîya û xeylê kesî beşdar bîyî. Fitar ra dima dayîk û sîyasetmedaran çalakîya roniştişî da destpêkerdene. Çalakîye de dayîkan qisey kerd û waşt ke wa tecrîd bêro wedarnayene. Dima ra deyîrî ameyî vatene û çalakîye bi siloganê ‘Wa bicuyo xoverdayîşê zîndanan’ û çepikan qedîyaye.
Heto bîn ra bajarê Hannoverî yê Almanya û paytextê Danîmarka Kopenhag de zî çalakîyê şermizarkerdişî ameyî viraştene. Hannover de rayberîya Meclîsê Komelê Kurdî yê Demokratîkî (DKTM) û bi paştdayîşê Meclîsê Cinîyan ê Şehîd Ronahî çalakîyêk ameye viraştene. Kopenhag de zî semedê wayîrvejîyayîşê grevê vêşanîye û rojeyê mergî kurdîstanijî û dostê înan kuçeyan de bî. Çalakgeran bi sloganan xoverdayoxî silam kerd û ard ziwan ke heta serkewtiş ê zî do meydanan de bê.
AMED