Mele û Rayberê HDPê Amedî Arkan vat ke ê seba ke bertek şarê ra nîro, ê nêşono camîyan û wina vat: “Desthîladaran îşxalê welatêko bîn kenê, zimistanî de şonê bajarê şarî rijnenê û şarî danî koçkerdiş û peynî Sureya Fethî wanenê.”
LÊL AMED / AMED
Tirkîya de meleyan dewlete tayîn kena labelê mintiqaye ra demo ke meleyê ke yenî tayînkerdiş, mintiqa de sey polîs, qorucî xebat kenê. Meleyê dewlete camîyan de propogandayê kenê. Demê operasyonê îşxalî yê vera Rojawanî meleyan camîyan de Sureya Fethî wendê. Peynîya wendişê na sureye zaf hûmarî de welatijê êdî nêşîyê camîyan.
Qezayê DBP û HDPî de zî bi beşdarîya şar û raybarê partîye nimijê sivîlî yê Îneyî dest pê kerd. Nimaje ra her hewte bi desan beşdarî bena. Nimajê Sivîlî yê Îneyî ser o Mele û Rayberê HDPê Amedî Abdullah Arkan qise kerd.
Meleyan ra zilm kenê
Mele û Rayberê HDPê Amedî Abdullah Arkan vat ke ci ra Mele Abdullaho Kinaw yeno vatiş, seba ke verê banê HDPî kalabalixêk esto, no ser qezayê HDP û DBPî yenê het û nimajê sivîlî yê Îneyî kenê û wina vat: “Nika Amed de camîyan de seyî ra 90î meleyî bê zerrîya xo xutbeyê ke Dîyanet dano înan, wanenê. Zaf mele nika qazinc kenê û vanî ke ma zî zanenê xutbeyêko raşt nîyo la ser ma yeno ferzkerdiş, çimkî ma domanê xo pîl kenê, eke ma no karî fek veradê, ma nêeşkenê karêko bîn bikê.”Abdullah Arkan dîyar kerd ke demê îşxalê Efrîn, Girê Spî û Sêrekanî wendişê Sureya Fethî şaş o û wina domna: “Çimkî ma zanenê uca nê fetih o. Desthîlatdar uca îşxal kerdê, yanî destser ronayê. Mîyanê serrêk de des ray cayê şarê Rojawanî ame bedilnayiş, seba bananê înan rijya, şîyê kewtê çadirî hetta zaf hûmarî destê kesî ra çadir zî nêkewt. Koçberî ke Îdlîbî ra koçê Minbicî kerdê destê înan çadir zî nêkewt, zaf kesî nêçare nika şîyê sînorê Yewnanistanî.”
Şonê bajaran rijnenê
Arkan wina dewam kerd: “Bi nameyê dînî çikêkî kenî, dînî şenik visenê, kesê ke agahîya înan heqê dînî de çin ê û kitabê heqî nêwanenê û haya înan Kurano pîroz û hadîsê Pêxemberî çin o, vanî dîn wina yo. Bi nameyê dîn, dînî ra zirarêko gird danê. Ma seba ke bertek şarê ma ra nîro, ma nêşono camîyan. Desthîladaran îşxalê welatêko bîn kenê, zimistanî de şonê bajarê şarî rijnenê û şarî danî koçkerdiş û peynî Sureya Mekkeyî wanenê. Demê Fethê Mekkeyî peynîya 8 serrê bi selametî agêreyê welatê xo, no ser Sureya Fethî nîno wendiş.”
Wayîrê îmanî kes nêşono
Arkan tewro peynî wina qedîna: “Seyî ra 90î meleyê ra bi zorî û bê zerrî Sureya Fethî seba Rojawan danê wendiş. Meleyê zî peynî mîyanê xo komelî de şermîyenê, bi nameyê dîn karêko bîn yeno kerdiş, no zî rewşêka bi lanet a. Demê Yezîdî, sîstemê Benu Umeyye sey nê rojan dînî şuxilnaynê, her tim malbatê Pêxemberî ra lanet kerdê, domanê Pêxemberî Kufeyî ra dayê koçkerdiş û peynî zî Kerbelaye zî qir kerdê. Endamê malbatê Pêxemberî sey eşqîye nîşan dayê, rewşa nê rojan û demê Yezîdî zaf şonê yewbînan. Wayîrê îmanî kes nêşîno camîyan, çimkî îbadexgehan de çi heyfo ke faşîzm ca girewto.” Spot: Mele û Rayberê HDPê Amedî Arkan vat ke ê seba ke bertek şarê ra nîro, ê nêşono camîyan û wina vat: “Desthîladaran îşxalê welatêko bîn kenê, zimistanî de şonê bajarê şarî rijnenê û şarî danî koçkerdiş û peynî Sureya Fethî wanenê.”