Azayanê Kongreyê Îslama Demokratîk ke dustê wehşeta vera cenaze û dirbetinan Amed de destpa rojeyê xoverdayiş kerdî hikûmeta AKP rê nêrazîbiyen damusnay û persa ’no çi însanîyeto’ kerdî.

Cenazeyan parçe kenê
Serokê Komeleya Merdimanê Dîn yê Mêrdîn Fahrî Dogan’î ANF rê qisey kerd û vist vîrî ke, ‘Akp bin nameyê Îslamiyetî de bi aşman cenazeyan erdî de verdana, cenazeyan lete kena’. Dogan’î va ‘eke ma veng nêvejerê, ma dê bibê piyakarê wehşeta Cizîr û Sûr.

Fahrî Dogan’î vera bêvengiya îlahîyatçiyanê Tirkiye ra zî nêrazîbiyen damusna û wina va: “Bêrê misilmanan bivînê. 1400 serriyo Ûlûcamî ra vengê ezan nêbirniya, la 2 aşmiyo ewja de nimaz zî nêbeno. Cayo ke ti şirê Sûltanahmet de programî virazê, bê Amed û halê Ûlûcamî bivîne.

Îslama ke biya  îxtidar
Azaya Şûrayê DÎK Guler Ozavci diyar kerd ke, ganî vera wehşeta ke Kurdistan de qewimena xoverdayişekê piyayî  bîro dayen. Ozavci va, dustê ma de jû sîstemekê hegemon ke wazena serdestiya xo ferz bikero esta û wina va: “Îxtidara AKP kevneşopiyê da winayîn ra yena. Nika zî bi îslama ke biya îxtidar ra piya wazenê zilmî çimê civakî de meşrû bikerê.

Bi xoverdayişî vera zilmî vindeme
Guler Ozavci da zonayen ke, ê wazenê misilmanê ke hetê îslama îxtidarî ameyê teviznayen heşyar bikerê û vist vîrî ke “Zilmo ke yeno ramiten eleqeyê xo bi îslamiyet çinyo. Ozavci da zonayene ke rojeyê xoverdayiş 1 hefte pey xo te terna û va: “Heta ke no wehşet nêqediyo, heta ke cenaze nîrê giroten û dirbetinî nêhewadiyê nêweşxane nûmayişê ma zî dê nêqediyê. Ozavci veng da herkesî ke vera zilmî veng vejerê. 
Rojeyê xoverdayiş Stenbol de zî rameno. Azaya Şûrayê DÎK Emîne Mûgûltay vist vîrî ke, xoverdayişê îyenan ‘însanî û îslamî’ yo. Mûgûltay va vera zilmî destê kê ra çi yeno ganî ey bikero û wina va: “Ma bi dûa û xoverdayişî vera zilmî vindenê. Nêwazeme kes birimo. Wa no herb û merdişî vinderê. Mûgûltay çiyo ke bodrimê Cizîr de beno şibna zey Kerbela û da zonrayene ke dirbetinî nêwedariyenê nêweşxane û bi teyşanî terkê merdiş yenê kerdin.

Misliman birayê mislimanî yo
Azaya Meclîsê Ceniyan yê DÎK Elîf Kubra Înal da zonayene ke, ê vera zilm xoverdayiş de yê û aşkere kerd ke ê wazenê bi rojeyê xoverdayiş mesaj bidê kesê ke vera zilm bêveng manenê.
Îmamê verên Ahmet Ûlaş’î zî vist vîrî ke raya piya cuwyayiş, bi ziwan û kamîya xo ra piya cuwyayiş o û wina va: “Îslamiyet vano ‘Misliman birayê mislimanî yo, mavêna mislimanan de ciyakarî nêbeno’. Tirk çi qe wayrê heqî yo, gune Kurd z î hendayî wayrê heqî bo. Wazenê Kurdan welatê ci de bikerê kole.  Ma Kurdî hinî nay qebûl nêkenê. Ma wazeme zey hemwelatijê têdûşt û azad bicuwê.

Şima hinî nêşenê bixapînê
Azayê Şûrayê DÎK Şukru Aslan’î zî vist vîrî ke, Kurdî di sey serriyo serva heqanê xo 30 reynî serewedarnay, la her tim hetê dewlet amey xapînayen. La endî şima nêşkenê Kurdan bixapînê. Aslan’î peynî de va, eke jew ca de qedexeyê ‘vetişê teber’ esto se, ganî ewja de herkes bivejyo kuçeyan.
Azayê Şûrayê DÎK Mehmet Emîn Arslanî zî vist vîrî ke, şarê Kurd endî birabiyena ke zereyê ci de ‘heqê cuwyayiş û kamî çinêbo’ qebûl nêkena. Arslan’î va, ma birabiyena Habîl û Kabîl’î nê, Birabiyena Hz. Mûsa’yî wazeme. Arsalan’î vatişanê Wezîrtiya Diyanet yê ‘nê alimê dînî niyê’ ra nêrazîbiyen damusna û aşkere kerd ke, serokê dîyanet zey serokê jû partî qisey keno.

ANF/AMED/STENBOL