Dewleta tirk Kurdistanê de tewir bi tewir kayan kena. Bi rayîra CHP Kurdê Elewî, bi rayîra AKP zî Kurdê Sunnî erzena dome xo yê tirkperêstî. Dewleta tirk bi taybet 1980 ra nat dîne Îslamî sey sîleh hemverê kurdan şuxulnena. Dîne Îslamî sey dîne tirkperêstî nîşandana. Dîne Îslamî qey hîzmetkarîya tirkperêstî dana şuxulnayîş. Qey ne çîyî tewir bi tewir rêxistinan ronena. Pê nê rêxistinan wazena şarê kurdî biance dome xo. Bin nameyê dîne Îslamî de kurdan bixapîno, ver bi qirkerdişîra bêro.
Dewleta tirkî qey nayî 1987’de Hîzbul-kontra awankerd. Hetanê serrê 2000 kerd tetîkkeşê xo. Dewleta tirk ser Hîzbul-kontra ra zaf însanê ma yê welatparêzî kiştî. La dewleta tirk se kerd, sernêkewt. Gureyê Hîzbul-kontra 2000 dima ra hetanê 2004 dayî vindernayîş. PKK senî 2004’î de xoverdayîş newe da destpêkerdiş, AKP-TC zî reyna Hîzbul-kontrayî vetî meydanî. La rolek zaf pîl nêda înan.
AKP, 2002 de senî bîya hukmat, gureye zaf girdî dayî Fetullahîyan. Xora Kurdistan de çiqasî şefê polîsan bibî, zafê înan Fetullahî bî. Mehkemeyan de giranîyê hakim û dozgeran Fetullahî bî. Mektebî zî teslîme Fetulahîyan kerdibî. Hetta hina bibi ke nuştox sey Halît Kakinç înan eşkera nuştênê û vatênê, gera Hukmatê AKP, Kurdistan teslîme Fetullahîyan bikero. Fetullahîyan ser ra zî hema pêrone bajarê Kurdistanê de dersxane akerdibi. Heme ca de ser nameyê EHÎ-DER eywane wendişî akerdibî. Fetullahîyan ser kurdanê welatperweran zaf komployî viraştî. Medyayê xo de hemvere şarê kurdî şerê psîkolojîk ramnenê. Çiqas sîyasetmedarê kurdi bibî, hema hema pêronê înan girewtî, eştî hepisxaneyan. Vatî ‘ma operasyane KCK virazênî.’ Xora Fetullahî Gulenî zî payîze 2011 ser medyaye eşkera fermana qirkerdişe kurdan da. Çi bibi çi çinbî Fetullahîyan ard serê kurdan. AKP, pê Fetullahîyan tam 13 serrî şerê kurdan kerd. Hetanê şerê AKP û Fetullahîyan hina dewamkerd. La dema şerê înan bi, AKP va tîya ra pey îxtîyacîyê mi Fetullahîyan ra çîn o.
AKP, hurendîya Fetullahîyan de nika Hîzbul-kontra Hudaparî vistî hereketê. Hîzbul-kontra Hudaparîyan senî astîyê AKP dî, fekê înan ra aw amî. Va ti çi gureyî bidî ma, ma anî ca. Nika Hîzbul-kontar Hudaparî çi xirabî û neyartî estî wazenî bîyarê ser kurdan. Hîzbul-kontra Hudaparî nika eşkera bi eşkera dagirkerîya dewleta tirk pawenî. Ala tirkan leqnenî û şananî. Hîzbul-kontra Hudaparî ser esase neyartîyê şarê kurdî de Perînçek, MHP, AKP û Ergenekoncîyan ra pîya hereket kenî. Pîya mîtîngan virazênê. Pîya qiseykenî. Hîzbul-kontra Hudaparî kiştê esker û polîsê tirkan de ca gênî û hêrîşê şarê kurdî kenî. Şarê kurdî nê çîyan Hîzbul-kontra Hudaparîyan ra nêverden o.