Roje çin a ke zîndananê Kurdistan û Tirkîya ra xeberê zext, teda û îşkenceyî nêrî. Tewr peynî xeberêk zî Zîndanê Tîpa Tyî yê Bafra ra ameye.
Seke yeno zanayîş çend rojî verê 15 hepsîyî Zîndanê Tîpa E yê Sêrtî ra surgunê Zîndanê Tîpa Tyî yê Bafra bîybî. Merdimê hepsîyan seba pêvînayîşo akerde şî zîndan. Keyeyê hepsîyan qala pêvînayîş û îşkenceyo ke înan û hepsîyan ame kerdiş, kerdî. Babete ser o Şermîn Îlgene qisey kerde.
45 deqa qîrayîşê înan bi ma dayî goşdarîkerdiş
Îlgene va ‘ma hetê gardîyanan ra nizdîyê 45 deqa bi hawayo kîlîtkerde ameyî verdayîş’ û wina dewam kerde: “Hema 5 deqa mendbî ke pêvînayîş biqedîyo, gardîyanan va ‘pêvînayîş qedîyayo’. Dima ra verê hepsîyan salone ra vetî. Bi vetişê hepsîyan vetî, berî ma ser de kîlît kerdî. Senî ke beran kîlît kerdî, vengê qîrayîşê hepsîyan ame ma. Ma nizdîyê 45 deqa qîrayîşê hepsîyan goşdarî kerd. Wexto ke ma pers kerd ‘se beno?’ ti kesî cewab nêda ma. Ma rewşa hepsîyan meraq kenî û ma etirîyenî.”
Şima heme do cilanê tek tîpan xora bidîy
Îlgene qiseykerdişê xo de qala vatişanê hepsîyan zî kerde û wina va: “Hepsîyan ma ra vatîy ‘zextî zêde bîyî û ma ser de cilanê tek tîpan ferz kenî’. Gardîyanan hepsîyan ra vato ‘zaf nê, 1 aşme ra dima şima heme do cilanê tek tîpan xorabidîy. Eke şima xoranêdîy, şima do nêvejyî mehkeme’. Gardîyanî bi nê vatişan hepsîyan tehdît kenî.”
Wa herkes wayîrê hepsîyan bivejîyo
Heto bîn ra pîyê Rozerîn Îldana ke Zîndanê Xarpêtî de ya Nîhat Îldanî derheqê zext û îşkenceyê gardîyanan kerd. Îldanî va ‘seba ke hepsîyan serê kameraye padayo, derheqê înan de doze abîya. Wexto ke hepsîyî şonî îfadedayîşî, vernîya çimanê dozgerî de raştê hêrişê gardîyanan ameyî’ û wina dewam kerd: “Dima ra gardîyanan eşto koguşan ser de û îşkenceyê heme cinîyan kerdî. Ez 40 rojî yo ke kênaya xo ra ti xebere nêgena, kênaya mi odeyo sîngerin de yena vindarnayîş. Ma zî do sey kênayanê xo xover bidîy. Ganî herkes wayîrê hepsîyan bivejyî.”
BAFRA/XARPÊT