ZEYNEP DURGUT / JINNEWS / WAN
Roşanê Qurbanan de heywanê ke Brezîlya ra ameybî girewtene de nêweşîya rîşa sîyaye (şarbon) ameye dîyayene û na nêweşîye vilayê xeylê cayan bîye. Nêweşîya rîşa sîyaye herêma Serhedî de zî ameye dîyayene. Xeylê dewê ke girêdayeyê merkezê Colemêrgî yî de na nêweşîye ameyî dîyayene û ame musayene ke 201 heywanî nêweşîye ver merdî.
Bêrîvanê ke bi serran o heywanan miqate kenî, reaksîyon nîşanê teber ra herînayîşê heywanan dayî. Bêrîvanan ra Emîne Erteme va ‘ma heta nika problemêko winasî nêcuyayî’ û wina domnaye: “Şar herêma Serhedî de debara xo bi heywanan keno. Labelê polîtîkaya şaşan ver nêweşîye vila bîye. Ma verê cû heywananê xo mergeyanê tewr rindan de çerênayêne û her hewte darû kerdêne. Nika bi vilabîyayîşê nêweşîye û krîzê ekonomîke cuya ma zaf bîya zehmetin.”
Kejê Budake zî va ‘qedexebîyayîşê zozanan ra dima vilabîyayîşê şarbonî, derbêka girde dîyayo heywankarîye ro’ û wina dewam kerde: “20 serrî yo ke ez bêrîvanîye kena. Ma hewteyêk de reyêk heywananê xo darû kerdêne. Xeylê heywanî merdî. Verê zozananê ma qedexe kerdî, dima ra nêweşîya rîşa sîyaye vila bîye. Nêyî tesaduf nîyî.” Emîne Budake zî daye zanayene ke nêweşîya rîşa sîyaye bi hawayo zanaye ameye vila kerdene û ganî şar reaksîyon nîşanê nê polîtîkayan bido.