DBPyî vilaweka netîceyî de vato AKP derbeya 15ê temuze kerdo mehne û polîtîkayanê derbekaran visto dewre û na çarçewa de hêrişê sîyasetê kurdan û hêzê demokrasiye keno û vilaweke wina domîyayo: “Rejîmê AKPyî hêrişê çîyo ke aydê xo nîyo keno û bi no hawa wazeno ê çîyî xirabe bikero û bêerje verado û xesp bikero. Na merhale de AKP encax bi konseptê şerî eşkeno xo payan ser de bigîro.”
Ma bi têkoşînêk birêxistinî eşkenî bivinderî
Vilaweke de bale ancîyayo tewqîfkerdişê hemserek û parlamenteranê HDPyî û nê tewqîfkerdişî sey gama peyêne ya nê konseptî ameyo şinasekerdiş û wina dewam kerdo: “Merdim eşkeno vernîya xitimîyayîşo ke AKPyî Tirkîya dekerdo mîyan bigîro. Vera derbe de vindetiş heqêk o û eynî wextî de wezîfeyê merdimîye yo. Ganî her merdim nê hetî de berpirsîyarîye bigîro milê xo. Ma zanî ke hukmatê AKPyî qasê ke wazeno xo nîşan bidero, hende bihêz nîyo. Saya têkoşînêk birêxistine de konseptê şerî merdim eşkeno vila bikero. Ma bawer kenî ke vera nê konseptê şerî de vindetiş, têkoşîn dayîş wezîfeyê her welatîyo ke xeyalê Tirkîyayêka demokratîke keno, berpirsîyarîya ci yo.”
Îradeyê 6 mîlyon kesan çinî hesibîyayo
Vilaweke de ameyo vatiş ke bi tewqîfkerdişê parlamenteran îradeyê 6 mîlyon kesan çinî ameyo hesibnayîş û wina domîyayo: “Îradeyê şarî ameyo xespkerdiş. Heme erjê sîyasî, huqûqî û ehlaqî çinî hesibîyayo. Bi zext û zordarî hêrişê dînamîkê demokrasiye yê Tirkîya û welatîyan ameyo kerdiş. Bi tewqîfbîyayîşê parlamenteran yew rewşa neweyî vejîyaya werte. Hedefê ma yo esasî no yo ke ma do na rewşa neweyî de ganî têkoşînê xo bivejî merhalêka neweyî. Kurdistan de şarê kurdî bin şert û mercê tewr giranan de xoverdayîşêk aver berdo û rojawanê Tirkîya de zî roşnvîr, akademisyen, nuştox û rêxistinê sîvîlî têkoşînêk dayî. Ma do nê her di têkoşînan bîyarî têhet û seba nêyî zî ma do heme îmkananê xo seferber bikerî.”
Seba partî û dezgeyanê kurdan vengdayîş
Vilaweke de seba partî û dezgeyanê kurdan veng ameyo dayîş û wina vajîyayo: “Vera polîtîkayanê AKPyî ke îradeyê şarê kurd nêşinasnenî û bi tewqîfkerdiş îradeyê kurdan ceza kenî de ma veng danî heme partîyê sîyasî, dezge û rêxistinanê kurdan; wa mîyanê platformê têkoşînî de bibî. AKPyî seba ke tevgerê kurdan vila bikero, bi hezaran pêşeng û endamanê HDP û DBPyî tewqîf kerdo. Seba ke têkoşînê şarê ma bêpêşeng û bêîrade nêmano, ma veng danî her kesê ke verê cu mîyanê sîyasetê kurdan de îdarekarîye kerdo, an zî tede ca girewto; wa bêrî teşkîlatanê ma de ca bigîrî. Nê wextî tarîxî de rolê xo kay bikerî.”
ANF / AMED