Parlamenterê HDPyî yê kehen Kemal Aktaşî derheqê weçînayîşê 24ê Hezîrane de dîyar kerd ke ganî heta 12ê Gulane herkes qeydê xo yê weçînayîşî bivirazo. Namzedê HDPyî Selahattîn Demîrtaş zî zîndan ra mesajêk erşawit û wina va: “Rayê şarê ma yê teberê welatî zaf muhîm î. Vernîya ma de firsendêko tarîxî esto, cok ra ganî ma nêyî baş bixebetnî.” Seba weçînayîşê 24ê Hezîrane aşkerebîyayîşê namzedan ra dima nika xebatê weçînayîşî zî dest pêkerdî. Qasê Kurdistan û Tirkîya, rayê ke Ewropa ra yenî dayîş zî zaf muhîm î. Cok ra Ewropa de zî lez dîyayo xebatanê weçînayîşî. Çend rojî verê bi beşdarbîyayîşê xeylê partîyê sîyasî, dezge û rêxistinan Koordînasyonê Weçînayîşî yê Ewropa yê HDPyî awan bî. Nizdîyê 5 hezar kesî nê xebatan de ca gênî û kesê ke mîyanê nê xebatan de ca gênî ra yew zî Parlamenterê HDPyî yê Wanî yê kehen Kemal Aktaş o. Aktaşî bale ant ser ruhê 7ê Hezîrane ser û wina va: “Ma do bi ê ruhî bixebetyî û AKP bierzî eşteyê tarîxî. Cok ra ganî herkes sefer bibo. O wext do faşîzm şêro û aştîye û biratîye hakim bibo. Nika Tirkîya mîyanê rojanê zehmetinan ra derbaz bena û krîz û kaosê girdî yenî cuyayîş. Êdî destê AKPyî de çîyêk nêmendo pêşkêşê şarê kurd û Tirkîya bikerî, nêmendo. Erdogan wazeno no weçînayîş de dîktatorîya xo mende bikero. Eke vernîya ci nêro girewtiş, donemêko xirab paweyê Tirkîya de yo. Ganî ma bi ruhê seferberîye bixebetyî.” Tesîrê reyanê Ewropaye zaf o Aktaşî qala muhîmîya reyanê Ewropaye kerd û wina va: “Prosesêko winasî de tesîrê bextwaştox, muxalîf û surgunê ke Ewropa de yî zaf o. Ma demêko nizdî de dîbî ke Sirri Sureyya Onder verê vînî kerdbî, labelê badê ke rayê Ewropaye ameybî hûmaritiş, amebi weçînayîş. Cok ra wa weçînitoxî heta 12ê Gulane qeydê xo yê weçînayîşî virazî. Eke qeydê xo nêvirazî, ma nêşênî rayanê xo bixebetnî. Yew ray, yew ray o û tesîrê ci esto. Ganî ma bi berpirsîyarîya 7ê Hezîrane ra hîna zafêr bixebetyî.” Rayê teberê welatî zaf muhîm î Heto bîn ra Namzedê Serekkomarîye yê HDPyî Selahattîın Demîrtaşo ke Zîndanê Edîrne de yo, seba weçînitoxanê teberê welatî mesajêk erşawit. Demîrtaşî mesajê xo de vato ‘ez verê cû silam û heskerdişanê xo şarê ma yê teberê welatî rê erşawena’ û wina dewam kerdo: “Şarê ma yê dîyaspora parçeyêka muhîme yê têkoşînê azadîye yo û zaf fedakar o. Donemanê weçînayîşî de rol û mîsyonê girdî kewenî şarê ma yê teberê welatî ser. Rêxistinkerdişê kampanyaya weçînayîşî tena şîyayîşê sindoqî ser nîyo. No eynî wextî de rêxistinbîyayîş, propoganda û dîplomasî yo zî.” Wa amadekarîyê xo goreyê ci bikerî Demîrtaşî dewamê mesajê xo de wina vato: “Rayê teberê welatî sey her weçînayîşî, no weçînayîş de zî muhîm î. Kadroyê ma yê ke do xebatan bikerî; nika vernîya ma de firsendêko tarîxî esto. Ganî ma nêyî baş bixebetnî û heme weçînitoxan bîşêrî ser sindoqan û ewleyîya sindoqan zî bigîrî. Teberê welatî de 7ê Hezîrane de raydayîş dest pêkeno. Cok ra wa heme şarê ma yo welatperwer û hêzê demokrasî goreyê ci amadekarîyanê xo bikerî. Ez heme embazanê xo rê serkewtiş wazena. Ma do bi tesilê 24ê Hezîrane de serbikewî.” n MERKEZÊ XEBERAN