Dewa Mursalî ya qezaya Dîvrîxî ya Sêwazî ke tede viraştişê madenê altûnan yena plan kerdene ver dewijî reaksîyonin î. Dewijî vera na polîtîkaya texrîbkerdişê tebîetî de hêrsin î û dîyar kenî ke veşnayîşê daristanan û ziwakerdişê çeman xizmetê eynî polîtîkayan kenî.
Dewijan ra yewî da zanayene ke nika hewl dîyeno zirar bidîyo dewa înan û wina va: “Wazenî çimeyanê ma jarin bikerî û nê cayan bêmerdim biverdî. Ma vera nê polîtîkayan de yî. Ma talano ke hetê hukmatî ra yeno kerdene, qebul nêkenî. Ewro veşayîşê koyanê Dêrsimî, ziwakerdişê çimeyanê awan û Sêwaz de veşayîşê merdiman nîşan danî ke eynî polîtîkayî dewam kenî. Ez wazena wa heme elewî û şarê Dîvrîxî bibî yewe û pîya problemanê xo çareser bikerî.”
Dewijêko bîn zî wina va: “Ez na xebate qebul nêkena. Eke na xebate temam bibo, mal, can û erdê ma şonî. Heme do çinî bibî. Ma nêwazenî. Ma awa pake wazenî. Ma nêwazenî çimeyê awanê ma çinî bibî. Ma tîya de pîl bîyî û ma do tîya de bimirî. Wa erdê ma nêgirî û jarin nêkerî.”
PÎRHA / SÊWAZ