2 rojî verê Kongreya 3. ya Meclîsê Sûrîyeya Demokratîke (MSD) Tebqa de ame viraştene. Vilaweka netîceyî ya kongre ameye aşkere kerdene. Vilaweke de ame dîyar kerdene ke kongre bi 300 delegeyan û bi siloganê ‘Ver bi çareserîyêka sîyasî û Sûrîyeyêka demokratîke’ Tebqa de kongre ameye viraştene’ û wina dewam kerdo: “Kurd, ereb û sewbîna partî û rêxistinanê bînan ra mesajê pîrozkerdişî ameyî. Mesajanê xo de destek dayî têkoşînî.” Dewamê vilaweke de wina ameyo vatene: “Qiseykerdişê hemserekan ra dima, meymanî qisey kerdî û dima ra raporê fealîyetî ameyî wendene. Tuzugê Meclîsî ame bedilnayene. Ame dîyar kerdene ke heta ke problemê komelkî çareser nêbî, problemê neteweyî zî çareser nêbenî. Beşdarvanî awanbîyayîşê Meclîsê Sûrîyeya Demokratîke seba çareserîya krîzî sey gamêkî dîyî. Kongre de xeylê qerarî ameyî girewtene.” Vilaweke wina qedîyayo: “Beşdarvanî dîyar kerdî ke heme dagîrkerîya dewleta tirkî ya Sûrîye bêrî veng vetene. Qerarê Konferansê Azadkerdişî yê Efrînî ke Şehba de ame viraştene, do bêrî ca û reyna do seba agêrayîşê şarê Efrînî xebatî bêrî kerdene. Tewr peynî Emîne Umer û Rîyad Deradr sey hemserekî ameyî weçînayene. Îlham Ehmede zî bîye Sereka Heyetê Caardişî ya Meclîsî. 20ê ci cinîye 41 kesî seba Konseyê Serekîye ameyî weçînayene. Endamî dîyar kerdî ke ê do şopa şehîdan taqîb bikerî û seba awankerdişê Sûrîyeya demokratîke soz dayî.”  ANHA/TEBQA