Vîrardişê Axuçanî ke her serre bi hawayo ananeyî qezaya Xozatî ya Dêrsimî ra girêdaye dewa Bargînî de yeno viraştene, emser zî ame viraştene. Sere de temsîlkarê partîyanê sîyasîyan, temsîlkarê komeleyanê elewîyan û xeylê kesê bînî beşdar bîyî. Vîrardiş rêzgirewtişê yew deqayî ke seba şehîdanê Kerbela ra heta roja ma ya ewroyî û dima ra gulbangwendişê Pîrê Ocaxê Axuçanî Alî Cansizî dest pêkerd. Qiseykerdişê akerdişî ser nameyê Komeleya Kultur, Hetkarîye û Sosyalî yê Ocaxê Axuçanî hetê Alî Gurtaşî ra ame kerdene. Gurtaşî qiseykerdişê xo de qala muhîmîya vîrardişî kerd. Dima ra panelo ke moderatorîya ci Pîr Zeynel Keteyî kerd, ame viraştene. Nuştox Turabî Saltik zî sey qiseykerdox beşdarê panelî bi. Panel de tarîxê ocaxan ame kerdene. Panel ra dima grûbê herême yê muzîkî deyîrê kurdî û tirkî vatî. Deyîran ra dima luqme ame vila kerdene. Vîrardiş de bi wendişê deyîşanê kurdî yê Alî Sîzerî semah ame girewtene. PÎRHA / DÊRSIM