Aktîvîteyê Vîrardişê Seyyîd Baba Mansûrî yo 3. Cemxaneyê Baba Mansûrî de ame viraştene. Çarçewaya vîrardişî de panelêk ame organîzekerdene. Pîrê Baba Mansûrî Suleyman Metîn, Prof. Ayfer Karakaya, Prof. Bedrîye Poyrad û Pîr Abdullah Bîlgîlî sey qiseykerdoxî beşdar bîyî. Dîlek Kizildage zî moderatorîya panelî kerde.
Panel de Karakaya derheqê tarîxê Elewîyê Bektaşî de melumatî dayî û wina va: “Xeylê hetan waşt ke Elewîyan werte ra wedarnî. Seba nêyî xeylê teorîyî erzîyayî werte. Merdimî nêzanî ke bawerîya xo bi çi bîyarî. Elewîyî saya dergah û ocaxan de ameyî roja ma ya ewroyî.”
Prof. Poyraze zî derheqê ‘raporanê Dêrsimî de rolê cinîyan’ de melumat dayî. Poyraze dîyar kerde ke çîyê ke Dêrsim de ameyî cuyayene, Qetilbîyayîşê Qizilbaşan o û çîyê ke derheqê cinîyan de ameyî nuştene ser o vindete. Poyraze va ‘qetlîyam de cinîyî bi tecawizbîyayîşî ameyî kiştene’ û wina domnaye: “Keynekî sey carîye dîyayî. Wexto ke ma kitab û rojnameyan ra ewnîyenî, cografyaya Dêrsimî sey bedenê cinîye yeno vînayene. No dewletanê dagîrkeran de yeno dîyayene. Tecawuzê cinîyan yeno meşrûkerdene û bi no hawa tecawuzê cografya zî yeno kerdene.”
Suleyman Metînî zî derheqê Ocaxê Baba Mansûrî de melumatî dayî. Panel ra dima loqme ame vilakerdene û muzîk reyde vîrardiş peynî bi.
PÎRHA/DÊRSIM