Yemenîkarîye hunerê destan ke ver bi vînîbîyayîşî şonî ra yewe ya. Yemenî eslê xo de welatê Yemen ra yeno û hetê kesêko bi nameyê Yemen-î Ekberî ra ameyo îcad kerdene. Viraştişê yemenîyî 5 tewirê çermî reyde beno. Yemenî herême de Dîlok, Riha, Gurgum, Amed, Antakya û Edene de vila bîyo. Labelê nika bêxera Dîlok û Kîlîsî de ameyo dûştê qedîyayîşî. Pêroyîya yemenîyî bi keda destan yena viraştene û herra ke mîyanê yemenîyî de esta, stresê merdimî gêna. Hostayê ke nê yemenîyan virazenî ra yew zî Denîz Ercellato 42 serreyî ke Dîlok de cuyeno yo. Ercelat dîyar keno ke yemeni seba ci yeno manaya tarîx, kultur û eşqî û wina domneno: “Ez heme siranê xo yemenîyan ra vana.” Ercellat vano ‘yemenî heme çîyê min o’ û wina dewam kerd: “Sey nimune turîstê ke yenî tîya, zaf eleqe nîşan danî. Verê cû wexto ke dewijî ameyênê yemenî herînayêne, nêşênayêne pereyê ci bidî. Roja ma ya ewroyî de heme çî fabrîkayan de yeno viraştene û erjan o. Pereyo ke nika seba yemenîyî yeno dayene, merdimî dejneno. Ewropayijî hîna zaf qîmet danî yemenîyî. Ez roşanan û rojanê yewşemeyan zî yena xebetîyena. Ez do heta bikewa mezelî zî karê xo bidomna.”  MA/DÎLOK