Bi nameyê Ahmet Tektaşî de keso ke taxa Xana Kelê ya Licê ya Amedî de cuyayêne û serra 1947î ra nata çîyê ke Licê de qewimîyabî heme defterê xo de nuştbî, 90 serrîya xo de wefat kerd.
Tektaşî 1947î ra nata înfazan ra heta vengkerdişê dewan, veşnîyayîşê Licê ra heta Erdlerzê Licê û kişîyayîşê Ceylan Onkole xeylê çîyî defterê xo de nuştbî. Tektaş vizêr saetanê şanî de nêweşxane de wefat kerd. Cenazeya Tektaşî mezraya Puneynî ya Licê de ameye definkerdene.
Tektaşo ke sey ‘Vîrê Licê’ ameyêne zanayene, xeylê çîyê muhîmî defterê xo de nuştbî. Defterê Tektaşî ser o belgefîlmê bi nameyê ‘Mi raştîyî nuştê Defterê Licê de’ amebi antene. Belgefîlm hetê rojnameger û derhêner Ersîn Çelîkî ra amebi antene û xeylê cayan de amebi nîşandayene.
Çîyê ke qewimîyayî nuştî
Tektaşî merakê xo yê nuştişê qewimîyayîşan ser o vatbi ‘serra 1947î de dewa ma de heman wextî de kesêk merd û kesêko bîn zî welidîya. Mi waşt ez nînan binusa, labelê mi nuştiş nêzanayêne. Ez bi hetkarîya dormeyî nuştiş musaya û mi aye roje nuşt. Mi wendiş û nuştiş leşkerî de musaya. Badê ke ez leşkerî ra ameya, mi dest bi nuştişê rojnuşteyî kerd. Mi dewe de merg, welidîyayîş, veyve û çîyê ecêbê ke bîyêne nuştênê.”
Tektaş serra 1997î de wexto ke leşkerî erzenê dewe ser, bi defterê xo yeno tepiştene. Leşkerî qereqol de dest ser nanî defterê ci, labelê Tektaş netîceyê israran de defterê xo tepîya gêno. Tektaşo ke 90 serrî de wefat kerd, pey xo de vîrêko gird verda.
MA/AMED