Dewa Talê ya Colemêrgî de netîceyê bombe eştişê wesayîtê bêmerdimî yê sîlehinî (SÎHA) keso bi nameyê Mehmet Temel merdbî û 3 kesî zî birîndar bîybî. Dima ra dewa Mişrifî ya Licêya Amedî de zî netîceyê hêrişî de 3 kesî birîndar bîybî.
Bitaybetî nê demanê peyênan de kesê ke bi no hawa yenî qetilkerdiş û yan zî birîndar benî, sey ‘terorîst, hemkar û xayîn’ yenî îlankerdiş. Babete ser o Parlamentera HDPyî ya Amedî Feleknas Ucaye qisey kerde.
Ucaye va ‘herême de polîtîkayêka topyekune ya qetlîyamî dewre de ya’ û wina dewam kerde: “Hewl danî demografîyaya Kurdistanî bibedilnî. Polîtîkayê ke ewro herême de yenî meşnayîş, serranê 90î derbaz kerdî. O wext bi destê Mehmet Agarî ameyênê kerdiş, ewro nameyê qatilan bedilîyayo. Senî ke o wext nêşînayî bikerî, ewro zî nêşenî.”
Nê wendekarê Tansu Çîllere yî
Ucaye vera îzehetê ke qetlîyaman ra dima yenî dayîş de reaksîyon nîşan daye û wina va: “Serranê 90î de Torosê Sipîyî estbî, ewro zî ÎHA û SÎHAyî estî. Ewro wendekarê Tansu Çîllere û Mehmet Agarî Tirkîya de sîyaset kenî. Zîhnîyetê Mehmet Agarî qetlîyamanê xo domneno. Ewro nameyê Çîllere seba parlamenterîye yeno munaqeşekerdiş. No daxî nîşanê ma dano ke ma rewşêka senîne de yî. Ewro qasê ke Stenbol û Îzmîr de çin o, fotografê Tayyîp Erdoganî Amed de ameyî aliqnayîş. Ê bi hawayo ke Kurdistan dagîr kerdî, hereket kenî. Qetlîyamê ke bi ÎHA, SÎHA û wesayîtanê zirxinan yenî kerdiş, polîtîkayanê Suleyman Soyluyî nîşan danî. Xora Soyluyî vatbî ‘beno ke tayê şaşî bîyî’ û bi no hawa şaşîyan xo de nê, wesayîtan de vîneno. Wa şarê ma baş bizano ke ma do heta dalpeya peyêne ya gonîya xo têkoşîn bidî.”
AMED