Hemseroka FEDA Bêmal Ozdemîr tecrîdê dûştê Rayverê Şarê Kurd Abdullah Ocalanî rê nêrazîbîyen damûsna û aşkere kerd ke Ocalan omidê xelesnayiş yê pêrokîn alewî û şaranê heremî yo.
Rayverê Şarê Kurd Abdullah Ocalan ke no 17 serrîyo bin şert û mercanê zaf giran de yeno tepiştiş, 5ê Nîsan 2015î ra na het xeber nîna giroten. Şarê kurd ke weşîya Rayverê xo ra guman keno welat û teberê welatî de serva rayverê xo meydanan de ser payan o.
Cenîyan koletî ra xelesna
Dûştê tecrîdî jû nêrazîbîyen zî Hemseroka Federasyonê Alewiyê Demokratîk yê Awrûpa Bêmal Ozdemîr ra amê. Ozdemîr zî dûştê şert û mercê ke Ocalan tede yeno giroten rê nêrazîbîyen damûsna û veng da hometa alewî û pêrokîn şaran ke dûştê qewimyayişan bivejyê kuçeyan. Bêmal Ozdemîr vist vîrî ke tecrîdo dûştê Ocalanî yeno maneya tecrîdekê dûştê pêrokîn şaran û cenîyan û nîya va: “Hendê fikirê Ocalanî bîyayiş û serbestîya ci zî muhîm a. Çike Ocalanî cenîya kurd kolebîyen û tariyîya Rojhelatê Mîyanî ra xelesna û açarna cenîya azad. Nayî ra ey ra xebernêgirewtiş tewr jêde kî guman dano ma cenîyan rê. Azadîya ma paralelê azadî, bîyayiş û ewleyîya Ocalanî ya.”
Çareserîya alternatîf eşt werte
Ozdemîr hayr ant rolê Ocalanî yê serva şar û îtiqatanê Rojhelatê mîyanê ser û nîya dewam kerd: “Rolê pêrokîn rayverê ke tarîx de serva şaran, îtiqatan, cenîyan û serbestîya civakî da xover cîya yo. La xisûsîyetekê cîya yê Ocalanî no yo ke qedr û qîymetekê gird da cenîyan. Ocalanî serbestîya cenîyan zaf rind analîz kerd û mane da. Serva ma cenîyanê alewî û hometa alewî felsefeyê Ocalanî zaf muhîm o. Serva şaranê Rojhelatê Mîyanî tenya Ocalanî çareserîya alternatîf eşt werte. Heta nika ma dî ke bêxebê Ocalanî ti quwetekê bînî Rojhelatê Mîyanî de çareserî nêvet werte. Eksê ci kaos û krîzî kerdê xorîn. Rojawa mînakekê ver çiman o. Nayî ra serbestîya Rayverê Şarê Kurd Abdullah Ocalanî serbestîya pêrokîn şaranê Rojhelatê Mîyanî ya.”
‘Kabeyê însan, însan o’
Hemseroka FEDA Bêmal Ozdemîr vist vîrî ke welatekê têtewr zey Tirkîye de derheqê Ocalanî de zonayişê înan çîno û va no kî vernîya raya ters û gumanî akeno.
Ozdemîr aşkere kerd ke ganî hometa alewî serbestîya Ocalanî bi qedr bivînê û nîya dewam kerd: “Serbestîya Ocalanî him wezîfeyekê exlaqî him zî wijdanî yo. Îtiqatê alewitî de dûştê nêheqî û zilm de vinderdiş wezîfeyê herkesî yo. Slogana navendê îtiqatê ma ‘kabeyê însan, însan o’ yo. Nayî ra ganî ma rîyê xo açarnê însanî, rîyê xo açarnime serbestîya Rayverê Şarê Kurd Abdullah Ocalanî.” Bêmal Ozdemîr vist vîrî ke Reîscûmhûrê Tirkîye Tayîp Erdogan wayrê zihnîyetê Emewî yo û aşkere kerd ke heta ke no zihnîyet bibo verikîn alewî û serbestî û bîyayişê kesî do bin garantî de nêbo.
Zihnîyetê Erdoganî yê Emewî yo
Ozdemîr aya kerd ke ganî herkes no talokeyî bivîno û nêvajo ‘ma rê teba nêbeno’ û vist vîrî ke hedefê Erdoganî de ferzkerdişê zihnîyetê Emewî esto. Hemseroka FEDA tewr peynî de hayr ant êrişanê dûştê alewîyan ser û qiseyê xo vengdayişê vetişê kuçeyan qedînay: “Tewr peynî de ma wextê hewldayenê derbeya peynî de dî. Hedefê sifte yê na zihnîyeta barbar war û taxanê alewîyan bî. Erdogan o ke derbe mîyan de derbe virazeno wazeno îradeyê şaran teslîm bigîro. Na zihnîyet CHP kî girot xo het û alewîyan, kurdan û pêrokîn quwetanê demokrasî hedef girota. Ganî dûştê na zihnîyet de ma kuçeyan de demokrasî û serbestîya Ocalanî qîr bikerê.
ANF/KOLN
Rojdema ma ya esasî serbestîya Ocalanî ya
Welatijê ke Îzmîr de ciwîyenê dûştê tecrîdê ser Ocalanî rê nêrazîbîyen damûsnay û aşkere kerdî ke rojdema înan ya esasî wedarnayişê tecrîd nê serbestîya Ocalanî ya.
Rayverê Şarê Kurd Abdullah Ocalanî ra xeber nêgirotiş şarê kurd vist guman û hereketî. Her ke şino dûştê tecrîdî nêrazîbîyenî benê hera. Kurdê ke Îzmîr de ciwîyenê zî tecrîdê ser Ocalanî rê nêrazîbîyenî damûsnay. Welatijan ra Felamez Çevîrenî aşkere kerd ke Ocalan bi mîlyonan kurdan temsîl keno û vist vîrî ke ê emelê damûstayînanê dewlet nêkenê. Çevîrenî da zonayen ke tecrîdî her kesî vist ters û gumanî û waşt ke heyetekê xoser şiro bi Ocalanî ra pêdîyayin virazo.
Serva kurdan kedê gird day
Çevîrenî da zonayen ke Tirkîye û Rojhelatê Mîyanî de temînatê haştî Ocalan o û vist vîrî ke raya kaos ra vejayiş serbestîya Ocalanî ya. Felamez Çevîrenî da zonayen ke Ocalan û embazanê ci serva şarê kurd emegê girdî day û aşkere kerd ke ganî şarê kurd zî waşrê Ocalanî bivejyo. Welatijan ra Îgne Akgul zî vist vîrî ke Ocalan serva pêro dinya wayrê erj û qedrekê gird o û dîyar kerd ke ganî tecrîdo ke yeno ramiten pêrokîn dinya rê bîro vaten.
‘Serbestîya ey wazenime’
Welatijan ra Îbrahîm Ozkahramanî zî aşkere kerd ke serva ke vernîya raya dînamîkanê civakî abîyo ganî aqûbeta Ocalanî bîro zonayen. Ozkahramanî hewcedarîyê ramitişê nûmayişanê bêîtatîyê sivîl ard ser zon. Welatijo bi nameyê Mehmet Yildirimî zî da zonayen ke serva ke welatî de demokrasî û azadî raveyşiro ganî Ocalan azad bibo. Mehmet Bozdaganî zî vist vîrî ke Ocalan tenya serva kurdan nê, serva pêrokîn şaranê Tirkîye û Rojhelatê Mîyanî têkoşîn keno û veng da her kesî ke çormeyê Ocalanî de bibê jû. Bozdaganî aşkere kerd ke wedarnayişê tecrîdî ra vêşêr ê serbestîya Ocalanî wazenê. Welatij Cemal Akdoganî zî vist vîrî ke tecrîdo ke Ocalanî ser de ferz beno antî-demokratîk o û verikîn veng da Awrûpa û herkesî ke dûştê tecrîdî bivejyê.
DÎHA/ÎZMÎR