Çendin çek û amuranê modern ê şer estê se, hemînan erşawenê Kurdisdanî û ma rê zi vanê; “Tirkîya de wextê çekan vîyarto.” Sey ke kûşatî/yarîyê xo bi mezgê ma bikerê, wazenê ma bixapîynê. Çîyo ke di şerê çewres serran de nêeşkîyayê bi ma bidî kerdiş, bi rayîrê dek û dolaban wazenê bikerê. La çi heyf ke, kurd kurdê kan nîyî û bi kayên înan ê demê Osmanîyan ra mendo nêxapîyenê.Mîyanê adirê Rojhilato Mîyanên de eke PKK çek verabido se, 6 aşman ra raver Kurd holî ra yenî wedarnayiş. Ti enka bişêrê yew domanî ra zi bipersê, do to rê bivajo ke; “Rojhilato Miyanên de çek yew tercih nîyo, mecburiyetek o.” Pîvanê bingeyîn ê erdnigarîya ma ana yo. No erdan de sîyaset bi no tewr yeno kerdiş.Yew mijarî de raşt vanê. PKK êndî teyna yew rayvistenêda gerilatey nîyo! Ê rojî tepa mendî. PKK, şerê gerilateyî bi hawayoda serkewte rayîra berd û ê heyaman ra viyart. Roja ma yo ewro de, PKK yew quweto bingeyîn ê Rojhilato Mîyanênî ya. Him hetê lejkerîye ra, him hetê siyasîye ra û him zî hetê dîplomasîye ra no çi ana yo. Şêwaza nêyî zî PKK êndî nêeşkeno heme persan biwazo bi reyîna çekan bîyaro rojdemî. Tayîn ca  de çek, di tayînan de sîyaseta legal û tayînan de zi newe ra awankerdiş do bivejîyo vernî. Xora enka ana zî yeno kerdiş. Kes sey domanan heme nîqaşan de deste xo nêerzino çekan!La belê; di çî têy ra ciya yê. Çek vindarnayîş cîya, têkoşîna çekdarî vindarnayîş cîya ya. Ganî nê nêkêwî têmîyan. Çi wazîyêno bêro vatiş se, ganî bi hawayêda zelal bêro vatene.Reyna; Şêwazo veradayîşê çekan, an zî ternayîşa têkoşîna çekdarî, PKKe ra vengdayîş ganî gureye qada ma yî legalî nêbo! Sîyasetkaranê HDPe ganî qet nêkewî nêy mijaran. Çi rey înan ra çîyêdo ana bero waştiş se, ganî vajê;Yew; ma dest de çek çinyê. Kam çekdar o se, şirê inan rê vajê.Di; sifte hema tepêşteyan û Rayver APOyî verabidê.Hirê; polîtîkayanê xo yê înkar û îmhaye verabidê û xoserîya demokratikî qebul bikî.Çar; fek talankerdişê Kurdistanîyî ra verabidê.Panc; Heme lejker, polîs û qontrayanê xo Kurdistanî ra tepa biancê û texribatê înan tanzîm bikerê.Şeş; Şorişa Rojawanî nas bikê û hetkareya xo DAIŞe ra tepa biancê.Heyanî ke dewleta tirke nê gaman nêerzo, heqê ci çinyo ke qalê çekan bikero.Bi raştî zi, ez hetê famkerdişî de zehmetî ancena. Eke ewro no şertan de eke PKK biwarzo payan ser, qîyamet biqilaynê û vatê ke; “Şima do senîn çekan verabidê? Eke şima çekan verabidê, Rojhilato Mîyanên de ma zî, şima zî û kurdayatî zî nêmaneno!” La ê warzenê vanê; “Mi gore zî ganî PKK çekan verabido.” Bi vatenên ana eletewş vane qey sîyaset zî ana yeno kerdiş.Merdim, dêso ke paştiya xo daye ci, nêşehetneno…Homa yew aqil bido…Zîndana Tîpa T’in a Sêwreg.



KENAN AVCI