Rayberê Şarê Kurd Abdullah Ocalan 18 serrî ra zêde yo ke Îmrali de binê tecrîdêko girankerde de yo û nizdîyê 2 serrî yo ke ti xebere tira nîna girewtiş. 2 hewte verê zî derheqê Ocalanî de xeberê mergê ci medyaya komelkî de ameyî parekerdiş. Vera nê xeberan de kurdî bi rojan o payan ser de yî û çalakîyî her ke şono hîra benî.
Nînan ra yewe zî 23ê teşrîna verêne de bajarê Strasbourgî yê Fransa de seba ewleyî û weşîya Rayberê Şarê Kurd Abdullah Ocalanî çalakîyêk dîyaye destpêkerdiş. Çalakîye roja 6. de dewam kena. Çalakîye her roje hîna hîra bena û her ke şono beşdarvanî hîna zêde benî.Babete ser o Endama Vera Şer û Dîktatorî de Forumê Aştîye yê Ewropa Fîlîz Koçalî, Hemserekê NCDK-S Metîn Mîntaş û Hemserekê NAV-DEMî Tahîr Koçerî qisey kerdî.
Çimê şaran Îmrali de yî
Koçalîye bale ante ser xeberê ke medyaya komelkî ser ro ameyî parekerdiş ser û wina va: “Ganî vera nê xeberan de reaksîyonê girdî bêrî nawitiş. Tirkîya de sere de Heyetê Îmrali û xeylê dezgehî no het de îzehetî dayî. Ma hewl danî vengê xo biresnî CPTyî. Çimkî no het de berpirsîyarîya înan ya huqûqî esta. Ganî CPT senî ke çîyêko winasî ame eşnawitiş, bişîyênê Tirkîya û rayapêroyî rehet bikerdêne.”
Koçalîye dewamê qiseykerdişê xo de va ‘hetê sîyasî yê nê problemî zî esto’ û wina domnaye: “Rojhelato Mîyanên de krîz û pêrodayîşî estî. Ancax Ocalan eşkeno problemanê Rojhelato Mîyanên çareser bikero. Sere de Rojawan û çim û goşê heme şaran Îmrali de yî. Wexto ke Reqqa ame azadkerdiş ra dima îzeheto ke ame kerdiş de zî vejîya orte. Seba huziro mîyanên yê Tirkîya, Ewropa û seba aştîya Rojhelato Mîyanênî ganî ma weşî û ewleyîya Birêz Ocalanî bizanî û ganî demêko rew de azade bibo. Ez zî cok ra tîya de ya.”
Komplo sernêkewte, la dewam kena
Mîntaşî zî dîyar kerd ke çalakîye bi hawayo bicoş dewam kena û wina va: “Seba vengvetişê komplo hewldayîşî domîyenî. Kurdî sere de prosesê Komploya Mîyanneteweyî ya 15ê Sibate û xeylê prosesanê zehmetinî derbaz kerdî. No şar vera hêriş û komployan de sere nêrona. Heta ke CPT berpirsîyarîya xo bîyaro ca, ma do çalakîya xo bidomnî.”
Ma do seba Rayberîye heme çî bikerî
Koçerî zî qiseykerdişê xo de xeberê ke derheqê weşî û ewleyîya Rayberê Şarê Kurd Abdullah Ocalanî de vejîyayî kerd û wina va: “Çalakîya ma ya ke vernîya CPTyî de dewam kena, heta ke Ocalanî ra xeberêkî bêro, do bidomîya. Ganî heyet, avûkat û endamê keyeyî yê Ocalanî pêvînayîş bikerî. Seba Rayberîya ma lazimî bi çi bibo, do bêro kerdiş. Ganî şarê kurd zî no het de hesas bibo. Ma ancax bi çalakîyêka bihêze, bi beşdarbîyayîşêko gird û bi xoverdayîş eşkenî Rayberîya xo ra xebere bigîrî. Vengdayîşê ma o yo ke wa şarê ma nê çalakîyan rê wayîr bivejîyo. Heta ke ma xebere bigîrî, do bidomîyo”
ANF/STRASBOURG