Seke yeno zanayîş 18 serrî yo ke Rayberê Şarê Kurd Abdullah Ocalanî ser de tecrîdêkî esto. 2011 ra nata Ocalan nêşêno avûkatanê xo reyde pêvînayîş bikero. 11ê êlula 2016î ra nata zî ti xebere Ocalanî ra nîna girewtiş. Çend hewte verê medyaya komelkî ser de derheqê weşî û ewleyîya Rayberê Şarê Kurd Abdullah Ocalanî ser de tayê xeberî ameybî parekerdiş.
Aye roje ra nata kurdî heme cayan de payan ser de yî û seba weşî û ewleyîya Ocalanî çalakîyan virazenî. Rêxistina HDP û DBPyî yê bajarê Mêrdînî zî seba ke bale biancî ser rewşa weşî û ewleyîya Ocalanî ser îzehetêkî dayî çapemenîye. Îzehet hetê Hemserekê HDPyî yê Mêrdînî Alî Sîncarî ra ame wendiş. Sîncarî va ‘xeberê ke derheqê weşî û ewleyîya Ocalanî de medyaya komelkî de ameyî parekerdiş, ma etirnenî’ û wina dewam kerd: “Seba ke etirîyayîş û fikirîyayîşê kurdan peynî bibî, ganî Abdullah Ocalanî reyde pêvînayîş bêro kerdiş.”
Dima ra Parlamenterê HDPyî Alî Atalanî qisey kerd. Atalanî dîyar kerd ke eke tecrîdo ke Abdullah Ocalanî ser de yeno meşnayîş bêro wedarnayîş, do vernîya çareserkerdişê probleman biabo û wina va: “Seba ke welat kaos ra bivejîyo, ganî tecrîd bêro wedarnayîş û Ocalan keye û avûkatanê xo reyde pêvînayîş bikero.”
JINNEWS/MÊRDÎN