Vîrûsê Koronayî bi lezî vila beno, hetanî nika hepisxaneyan de tedbîr nêameyê girewtiş. Taybetî rewşa Rayberê Şarê Kurd Abdullah Ocalanî yeno meraqkerdiş, heqpawitoxê merdimîye veng dayê ke wa Hepisxaneyê Îmraliyî bêro vengkerdiş
SEMRA TURAN
MA/STENBOL
Pêroyina Dinya de Vîrûsê Koronayî bi lezî vila beno, hetanî nika bi hezaran kesê cuya xo dayê. Tirkîya de zî çi heyfo ke hetanî nika hepixaneyan de vera nê vîrûsî tedbîr nêameyê girewtiş. Hepisxaneyê Îmraliyî de Rayberê Şarê Kurd Abdullah Ocalan binê tecrîdî de maneno û hetê ci de Omer Hayrî Konar, Hamîlî Yildirim û Veysî Aktaş manenê. Hetanê nika rewşa Hepisxaneyê Îmraliyî ser o nê Hukimata AKP, nê zî Wezaretê Edeletî aşkerayêk nêdayê û no ser zî şarê Kurd zî seba Rayberê xo qerqîzyeno.
Babete ser o Rayberê Anatoliayî yê SESî Erdal Guzel vat ke Tirkîya çi heyfo ke vera vilabîyayişê Koronayî ser o hadreyeyêk nêkerd, no ser zî hepisxaneyan de vera vîrûsî tedbîrê cidî nêameyê girewtiş û wina vat: “Ganî rewşa Îmraliyî de agahî bêro dayiş, qey Îmrali hîna bi muhîm! çimkî temsîlkarê aştîye Ocalan uca de maneno, goreyê hem emrê hem zî tay nêweşîya xo ser o Ocalan koma rîskî de ca gêno.”
Îmrali de Rayberê Şarê Kurd maneno
Avûkat Ercan Kanar zî aşkera kerd ke ganî bê cîyakarî Îmrali û heme hepisxaneyan bêrê vengkerdiş û heme hepsî sîyasî û edlîyê zî bêrê serbest veradayiş û wina domna: “Çi heyfo ke nika tewro heqo muhîm, heqo cuya binê teluke de yo. Ez her tim efo pêroyin pawita, nika vera vîrûsî tedbîrê cidî nêameyê girewtiş. Îmrali cayêko muhîm o çimkî, Rayberê bi mîlyonan uca de maneno. Heqo cuya binê teluke de yo û noser zî pawitişê aştîya komelî zî avzel o. Ganî Rayberê şarêkî Birêz Ocalan û heme hepsîyê bîn bêrê serbest veradayiş.”
Tesilî Wezaretê Edeletî agahî bido
Hemsereka Pêroyina ÎHDî Eren Keskîn zî destnîşan kerd ke hepisxaneyan cayê rîskîye, çimkî tedbîrê cidî nêameyê girewtiş, çi heyfo seba ke Îmrali de tecrîd esto, no ser çew nêeşkeno agahîyêk bigo û wina dewam kerd: “Vîrûsê Koronayî, nêweşîyêka bi mergî yo, hetanî nika derzîya ci zî nêame dîtîş. No ser zî hepisxaneyan cayê hîna bi rîskî û teluke yê. Eke tulekeyê mergî esto, mabenê kesî de cîyakerî nîno kerdiş. Ocalan ra çew nêeşkeno sey hepsîyêko bîn biewno, şarî ser o tesîrê ci zaf o, eke Vîrûsê Koronayî Îmrali de bêro dîtîş, no dem netîceyê ci zaf bi xirab bibo. No ser kesê ke seba Ocalanî qerqizyenê heqdar ê, çimkî Ocalan goreyê emrê xo koma rîskî de ca gêno, no ser ganî Îmrali bêro vengkerdiş.”