Hemsereka Konseyê Caardişî ya KCKyî Besê Hozate beşdarê programê televîzyonî bîye û derheqê 8ê Adare Roja Cinîyê Kedkarî yê Cîhanî de qisey kerde û vînayîşê xo ard ziwan.
Hemsereka Konseyê Caardişî ya KCKyî Hozate va ‘nika her çar parçeyê Kurdistanî de zî rêxistinbîyayîşêko muazam yê cinîyan esto’ û wina domnaye: “Şoreşê Rojawanî şoreşê cinîyan o. No şoreş de tesîrê cinîye xeylê gird o. Seba ke Şoreşê Rojawanî şoreşê cinîyan o, projeya neteweya demokratîke, sîstemê cuya pîya û azade ya şaran vejîyayo raşte. Netîceyê nê têkoşînî de cinîyê êzidî sîleh girewtî xo dest û vera dagîrkerî de şer kenî. Mîyanê Hêzê Sûrîyeya Demokratîke de bi hezaran cinîyê ereb, tirkmen, asûrî û suryanî estî. Heme cinîyan de gêrayîşê winasî estî. Têkoşînê cinîyan Afganistanî ra heta Hîndistanî, Asya ra heta Ewropaye xeylê cinîyan ser de tesîr viraşt. ”
Komel de rolê cinîyan gird o
Hozate qiseykerdişê xo de 8ê Adara heme cinîyan pîroz kerde û têkoşîn û xoverdayîşê heme cinîyan silam kerde û wina va: “Nizdîyê 10 rojî yo ke Kurdistan û zaf cayanê cîhanî de çalakîyê cinîyan estî û no muhîm o. Cinîyî çiqas têkoşîn danî, xo rêxistine kenî û benî yewe, hende hêz û îradeya xo gird kenî. O wext cinîyî karakterê sîyasetî bedilnenî û komel de vernîya demokratîkbîyayîş û azadî akenî. Reyna cînsîyetperestî û hakimîya camêrdî orte ra wedarnenî. Reyna cinîyî çiqas mîyanê artêşe de ca gênî, hende hêzê pawitişî ancenî ser xetêka demokratîke. Cok ra rol û tesîrê cinîye zaf gird û dîyarker o. Yanî cinîye heme komelî demokratîk û azade kena.”
Keda Ocalanî
Hozate va ‘dûşto ke nika cinîyî resayî, netîceyê keda Rayberê Şarê Kurdî Abdullah Ocalanî de bîyo’ û wina domnaye: “Netîceyê têkoşînê Rayber Apoyî de bîyo. Cinîye xo bi îdeolojî û felsefeya Rayber Apoyî xo zana kerde û bîye îrade. Reyna xo rêxistine kerde û sîyaset musaye. Cinîye bi kede û têkoşînê Rayber Apoyî camêrd bedilna û xo newe ra awan kerde. Cok ra ma cinîyê kurd minetdarê Rayber Apo yî.”
Şoreşê Rojhelato Mîyanênî bi azadîya cinîye beno
Hozate bale ante şoreşê Rojhelato Mîyanênî ser û wina va: “Şoreşê Rojhelato Mîyanênî bi şoreşê cinîye beno. Cok ra cinîyê Rojhelato Mîyanênî xo çiqas zana bikerî, têkoşîn bidî û bibî yewe do o wext şoreşê Rojhelato Mîyanênî bivirazîyo. Nê semedî ra şoreşê Rojhelato Mîyanên bi azadîya cinîyê Rojhelato Mîyanên beno. Nika vernîya nêyî abîyo. Ma cinîyê kurdî bi rol û mîsyonêko winasî do biwerzî lingan ser û azadîya xo pê bîyarî.”
Têkoşîn bide, bibe yewe û azad bibe!
Hozate peynîya qiseykerdişê xo de wina va: “Têkoşîn û xoverdayîşê cinîyan yê 8ê Adare xeylê muhîm û bimana yî. Senî ke şar hişyar benî, têkoşîn danî; faşîzm û dagîrkerî zî hêriş kenî. Eynî çîyî seba cinîyan zî derbazdar î. Vera nê hêrişan de hişyarî û têkoşînêko gird zî Rojhelato Mîyanên û cîhan de esto. No 8ê Adare de bi hawayêko xurt bivejîyo orte. Cinîyî nika heme cayan de xover danî û têkoşîn danî. Qet şik çin o ke ganî no têkoşîn tena rojêk nêbo. Ganî her roje seba cinîyan biba 8ê Adare.”
ANF / BRUKSEL