SEMRA TURAN MA/DÊRSIM Weçînayîşê 24ê Hezîrane rê tena 25 rojî mendî û bi nizdîbîyayîşê weçînayîşan xebatê weçînayîşî zî zêdeyêr benî. Cayê ke xebata weçînayîşî tede yena domnayîş ra yew zî Dêrsim a. Dêrsim de mîyanê heme partîyan de tena HDPyî namzeda cinîye nîşan daya. Cinîyê dêrsimijî qisey kerdî û dîyar kerdî ke ê do namzeda HDPyî Meral Hanbayat Yeşîle bierşawî meclîs. Cinîyan ra Nermîn Sonmeze dîyar kerde ke partîyê sîyasî namzeda cinîyî nîşan nêdayî û bi no hawa xo bi xo çinî kerdî. Sonmeze wina domnaye: “Dêrsim de partîyê sîyasî hertim camêrdî vejenî aver. Ganî cinîyî nêyî qebul nêkerî. Wa cinîyê dêrsimijî rayanê xo bidî HDPyî û Meral bierşawî meclîs.” Perîhan Hoşogluye zî va ‘herêma ke cinîyî tede xo azade hîs kenî, Dêrsim a, labelê partîyê sîyasî tîya de seyyewbînanîya cinîye û camêrdan esas nêgênî’ û wina dewam kerde: “Ganî cinîyê ke partîyê sîyasîyan mîyan de yî, nêyî qebul nêkerî. Wa cinîyî bi renganê xo partîyanê sîyasîyan de ca bigîrî. No het de namzeda HDPyî Meral Hanbayat Yeşîle heme cinîyanê Dêrsimî temsîl kena. Ganî ma zî namzeda xo ya cinîye bierşawî meclîs.” Ma do sindoqan de cewab bidî Cinîyan ra Bedrîye Polate zî wina va: “Dêrsim de partîyê sîyasî bi zîhnîyetê camêrdî yenî îdarekerdiş. Wa cinîyî destek nêdî partîyê ke înan çinî hesibnenî. Ma cinîyî do destek bidî HDP û sindoqan de cewab bidî. Tena yew namzeda cinîye esta û ganî ma seba şîyayîşê aye ya meclîsî, bixebetyî.”e