SEMRA TURAN / MA / DÊRSIM
Bi nameyê Emoş Bakiraye de dapîra 96 serrî ke şahidîya Qetlîyamê Dêrsimî kerda, wextê qetlîyamî de 15 serrî bîya. Dapîra Bakiraye o wext ra nata fek warê xo ra veranêdaya û hişê aye pêt o.
Dapîra Bakiraye dîyar kerde ke aye bi Kirmanckî hîna weş xo îfade kena û wina domnaye: “Ez eşkena Tirkî zî qala ci bikera, labelê Kirmanckî hîna weş îfade kena. Tena wa qala qetlîyamî bêro kerdene, bes o. Waştişê min o peyên o yo ke wa dewlete qetlîyam reyde têrî bimano.”
Bakiraye va ‘o wext ewil sîlehanê ma waştî’ û wina dewam kerde: “Şarî sîlehê xo dayî. Senî ke şarî sîlehê xo dayî, înan cinî, doman û extîyar nêvatî berdî, qetil kerdî. Newala Laçî de nizdîyê 400 merdiman xo nimitênê. Dima ra bombeyê jehrinî erzîyayî şikefteyan mîyan. Ma zî bi aşman şikefteyan de mendî û wina xelisîyayî.”
Bakiraye daye zanayene ke Dêrsimî qetlîyam xo vîra nêkerdo, do nêkero zî û wina va: “Ê se bikerî zî şarê Dêrsimî sey şabelûyêre ya. Xo newe ra keske kena. Ê bin ra zî bibirnî, 10 gilan ra zîl dana. Qetlîyamê Dêrsimî hîna zî dewam keno. Koyê ma hîna zî yenî bombekerdene û veşnayene. Merdimê ma yenî qetil kerdene. Waştişê min o peyên o yo ke wa dewlete qetlîyam reyde têrî bimano. Ez wazena aştîye bivîna.”