Qezaya Sûrî ya Amedî de bin nameyê ‘vurîyayîşê bajarî’ de qerarê ‘îstîmlaqkerdişo lez’ amebî girewtiş û nika wazenî welatîyê ke taxê Lalebey û Alîpaşa de cuyenî, taxan ra bivejî. Cayê ke welatî ti ra ameyî vetiş de rijnayîş dewam keno.
Kesê ke bêîmkanîyan ver nêşênî keyeyanê xo ra bivejî, cereyanê înan yeno birnayîş. Ziqaqê Belî yê taxa Alîpaşa ke çarçewaya rijnayîşî de ca nêgêno de zî 3 rojî yo cereyan çin o. Babete ser o taxijî qisey kerdî û reaksîyon nîşan dayî.Cinîya bi nameyê Havva Kayaye va ‘Rijnayîşan ra dima ma xeylê zehmetîyan antî. Bitaybetî hamnanî hewa zaf germ a. Aşma Remezanî de çi cereyan estbî û çi zî awe estbî. Wa Homa înan rê nêverdo. 2 rojî yo ke cereyan çin o.”
Ma kamî ra vajî?
Emîş Mutluya 80 serreyî zî wina va: “Ez 50 serrî ra zêde yo ke Sûr de cuyena û heta nika ez muameleyêko winasî reyde têrî nêmend bîya. Se beno wa bibo, ez tepîya game nêerzena. Wexto ke Licê de erdlerz bî, ma keyeyê xo ardbî Sûr. Mi bi serran tîya de çîyê xo merdimanê tîya reyde pare kerd, labelê nika çîyê ke benî ver ez şermayena. Ez extîyar a. Cayo ke ma muracat bikerî zî çin o. Ma kamî gerreyê kamî bikerî. Ma ti kesî ra çîyêk nêwazenî.”
Ma fam nêkerdo
Saîmeya 50 serreyî zî dîyar kerde ke keyeyê înan çarçewaya rijnayîşî de nîyo, labelê ê reyna problemê awe û cereyanî ancenî û wina dewam kerde: “Ma hewteyêk o ke bi problemê awe û cereyanî reyde têrî yî. Ma nika hesretîya awa serdin î. Ma keyeyê xo bi hezar zehmetîyî viraştî. No senî Serek o, ma fam nêkerd. Wazeno zulmî rê serekî bikero, ma hîna fam nêkerdo.”
Altun Kortepeye zî va ‘ma nêwazenî ke Sûr ra şêrî’ û wina domnaye: “Birîyayîşê awe û cereyanî ra tewr zaf domanî zirar vînenî. Yê ke nê zulmî ma rê rewa vînenî, wa bêrî rojêk bê awe û cereyan bimanî. Vejîyayîş rehet o, ma do şêrî kura?”
ŞÛJIN/AMED