Hemsereka Şaredarîya Dêrsimî Nurhayat Altun derheqê ravêreyeyî û hedefgirewtişê elewîyan de qalî kerd û vat: “Çeteyêy DAIŞî ke bi destê AKPî ameyî awankerdiş, şorişa ke bi vernîtîya cenîyan de virazya ra dima waştîy ke pergala xoserîya demokratîk bixeniqnîy. La demo ke nêresay armanca xo, ena ray dest bi hêrişêy cîya ya hemverê şarî kerdîy.Nêy hêrişan ra dima dewlet zî bi mehnekerdişê DAIŞî hêrişê PKKî keno.
Adirbestî xirab kerd
Altun ard ziwan ke weçînayîşan ra dima xeyalêy AKPî ya desthilatdarîyê veng vecîyayî û wina vat: “Hêriş di awayî virazyay. Awayo yewin, tecrîda ke ser Rayverê Şarê Kurd Abdullah Ocalanî yeno meşnayîş o. Heme şarêy bindest bin banê HDPî de amey têhet û verpersa desthilatdarî day. Nika zî hukimata ke ti meşruîyeta ci çînyo semeda ke desthilatdarîya xo bidomno, ser şarê bindest têmîyankewtişan virazeno û adirbestî zî qedênayo.”
Ravêreyî ra eciz bîy
Altun bal ant ser ravêreyeya weçînayîşan ra dima û vat: “7’ê hezîranî de HDPî bendaw vîyarna û AKP tena serê xo nêbî desthilatdar. Na semed ra AKP semeda weçînayîşêk bîn, dekewto mîyanê helwestan û mehneyan gêreno. No mehne bi vatişê Erdoganî ya ke vatênê ‘mase çînyo’ ra dest pê keno û dîyar o ke ravêreyeya çarekerdişî ra eciz bîy. Erdogan seyî lejkeran têgereno.”
Armanc pelçiqnayîş o
Altun dîyar kerd ke armanca operasyonan pelçiqnayîşê şarî yo û wina dergeyî da qalîkerdişê xo: “Wazenîy ke heme şaran bipelçiqnîy. Astengkerdişê meşa Bloka Aştî zî rewşek cîya yo û lazim o ke heme hêzêy demokrat hemverê no bivindîy. Weçînayîşan de şar bi diruşmeya ‘ma to nêkenîy serek’ serkewtişek gird amey dest vist. Ma do bi diruşmeya ‘Ma şer bi to nêdanîy kerdiş’ serbikewîy û no têmîyankewtişî veng bivecîy.”
Êdî elewîyê ser xeta azadîyê de yê
Altun der heqê hêrişêy ser elewîyan de ard ziwan ke dîrok ra heta nika ser elewîyan de kay yenî kerdiş û vat: “Pergalêy ke estîy û kesêy ke desthilatdar heta nika sîyaseta xo her tim ser çinîkerdişê elewîyan viraştîy. Eyro semeda ke elewî êdî ser xeta azadî waştişê xo yê azadîyê gênîy dest, AKP wazena bi destê çeteyanê DAIŞî elewîyan îmha bikero. Êdî ma nêbenîy maşaya dewletî. Cayê ke elewî tede bivindîy dîyar o û aye ca zî cayê azadîyî yo. Lazim o heme elewî pawitişê xo bivirazîy û destê ti kesan nêewnîyî. Hemverê çeteyanê DAIŞî lazim o ma bibîy yew û xover bidîy.”