Nika donemo newe yê perwerdeyî û mufredato newe yê perwerdeyî ser o munaqeşeyî yenî kerdiş û mufredato ke hetê AKPyî ra seba nê donemî ameyo amadekerdiş, hetê zaf kesan ra ame rexnekerdiş. Kemanîya nê mufredatî ra yewe zî ziwanê dayîke yo.
Bi nameyê Adnan Avciyo ke ser ziwan û kulturê lazan de xebatan keno, derheqê muhîmîya ziwanê dayîke de qisey kerd.
Avciyî va ‘5 serrî verê dersa weçînaye ya bi nameyê‘Ziwan û Lehçeyê ke cuyenî’ girîyaybî mufredatî mîyan, bêxera na derse ziwanê dayîke de perwerde çin o’ û wina dewam kerd: “Hetta bi hawayo zanaye nê ziwanî teber de ameyî verdayîş. Herçiqas ke bi hawayo weçînaye nê dersî girîyayî mufredatî, reyna zî ziwanê perwerdeyî hetê zîhnîyetê tekperestî ra ameyêne amadekerdiş. Ziwanê lazkî seke UNESCO zî vano, ver bi vînîbîyayîşî şono. Nika kesê ke 30 serreyî ra pîlêr î nê ziwanî zanî, labelê ciwanî fam kenî la nêşenî qisey bikerî. Eke ziwanêk nêbo ziwanê perwerdeyî, nêşeno bicuyo.”
Seke lehçe ya yena nîşandayîş
Avciyî va ‘wexto ke merdim mufredatî ra ewnîyeno, vîneno ke tena derheqê lazan de fiqrayê ke heqaretê lazan kenî, estî’ û wina domna: “Tayê cigêrayîşê ke lazan ser o ameyî kerdiş de zî lazkî sey lehçe yeno nîşandayîş. Dinya de xeylê cayan de ziwanê kemhûmaran sey ziwanê perwerdeyî ameyo qebulkerdiş û ganî Tirkîya de zî bêro qebulkerdiş. Çimkî lazkî ver bi vînîbîyayîşî şono. Seba neyî ganî bi hawayo lez no het de gamî bêrî eştiş.”
MA/STENBOL