Rêxistina Weşîye ya Dinya (WHO) derheqê vilabîyayîşê vîrusî de tersa xo pare kerd û îfade kerd ke hewteyo ke bêro de hûmara qurbanan do zêdêr bibo. Dinya de hûmara kesê ke bi vîrusê Korona kewtê 1 mîlyon vîyart.
Vera xopawiyayişê Vîrûsê Koronayî pêroyina Dinya û Tirkîya de zî welatijan keyeyanê xo de manenê la Tirkîya de vilabîyayişê vîrûsî domyeno. Temsîlkarê muzîkê Kirmanckîye Soner Soyero ke Almanya de cuyeno, bal ant hepisxaneyê Tirkîyaye de vilabîyayişê vîrûsî ra wina vat: “Çi heyfo ke no proses de nêçare keyeyanê xo de ma manenê û seba muzîkî ma nêeşkenê çik bikê. Goreyê Tirkîyaye, Almanya de rewş hîna weş a, çimkî dewleta Almanya seba weşîya şarî heme tedbîran girewta. Ma medyaya komelî ser o bi weşanê ganî merdiman têhet anenê û moral danê înan.”
Hepsê sîyasî ra zilm
Soner Soyer qanûnê înfazî ke hepsê sîyasî nêgirewt çarçiweya xo ser o wina domna: “Pêroyina Dinya de welatan heme hepsîyan bicîyakerî serbest veradayê la dewleta Tirk binê nameyê ‘sûcê terorî’ de hepsê sîyasî ra bi aşkera dişmenîya xo nîşan da, na rewş zî merdim qerqiznena. Eke hepisxaneyan de merg bivejê do berpirsîyar dewlet a. Ewlehîya hepsîyan ra dewlete berpirsîyar a, ez Wezîrê Edeletî Abdulhamît Guvenî ra veng dana û vana ke ganî heme hepsîyan bicîyakerî ganî bêrê serbestveradayiş.” MERKEZÊ XEBERAN