Dezgeyê Kongra Gel, KNK, CÎK û TEV-DEMî seba ke Roşanê Remezanî pîroz bikerî, îzehet dayî. Dezgeyan ra Kongra Gelî mesajê xo de bale anto tecrîdo ke Rayberê Şarê Kurdî Abdullah Ocalanî ser û wina vato: “Weçînayîşê 24ê Hezîrane seba hesabperskerdişî, firsendêko tarîxî yo. Wa herkes AKPyo ke dişmenê kurdan o ra durî bivindero.”
Dîvanê Hemserekîya Kongra Gelî, KNK, CÎK û TEV-DEMî bi wesîleya Roşanê Remezanî mesaj weşênayî. Hîrê dezgeyan zî mesajê xo de roşanê heme şaran pîroz kerdî û seba weçînayîşê 24ê Hezîrane veng dayî.
Kongra Gelî dewamê mesajê xo de vato ‘Rayber Apo roşanêko bîn zî binê şert û şurtê tecrîdî de derbaz keno’ û wina dewam kerdo: “Ma 11ê Êlula 2016î ra nata Rayber Apoyî ra ti xebere nêgenî. Dagîrkerîya Efrînî ver şarê Efrînî nê roşanî şert û şurtê zehmetinan de derbaz kenî. Reyna sîyasetmedar, hemserek, rojnameger û nuştoxî zîndanan de yî. Seba ke no roşan bibo wesîleya piştîdayîşyewbînanî ganî şarê ma yo welatperwer bixebetîyo. Weçînayîşê 24ê Hezîrane seba hesabperskerdişî firsendêko tarîxî yo. Wa herkes AKPyo ke dişmenê kurdan o ra durî bivindero. Wa ti kes nêkewo mîyanê na lêminîye û xo lêmin nêkero. Ma na çarçewa de roşanê şarê xo pîroz kenî.”
Kongreya Neteweyî ya Kurdistanî (KNK) zî mesajê xo de roşanê alemê îslamî pîroz kerd. KNKyî mesajê xo de wina vato: “Ma roşanî prosesêko krîz û kaosin de derbaz kenî. Vakur, Rojawan û Başûr de vera şarê ma de qetlîyamî yenî kerdiş. Dewleta tirkî Efrîn ra dima nika Başûrê Kurdistanî de dagîrkerîya xo domnena. Çîyo ecêb o yo ke yê ke hêrişê kurdan kenî, xo musluman hesibnenî. Ma hêvî kenî ke demêko nizdî de kurdî roşananê xo ortamêko aştî, azadî û huzir tede hakim î de pîroz bikerî. Ma bi na wesîle roşanê Remezanî, sere de hepsîyan û şerwananê azadîye, heme şarê Kurdistanî û alemê Îslamî rê pîroz kenî.”
Ma no roşan de zorê înan bîşêrî
Komelê Îslamî yê Kurdistanî (CÎK) zî mesajê xo de bale anto ser weçînayîşê 24ê Hezîrane û wina vato: “Kurdistan de yê ke vanî ‘birayê mi yê dînî’ bi serran o ke zulmê kurdan kenî. Zulmo ke Nemrut û Fîrawunan wextê xo de bi muslumanan nêkerdî, ewro hetê welatê ke xo musluman şinase kenî ra yeno kerdiş. Hukmatê AKP û Erdoganî Rojawan, Vakur û Başûr de rijnayîşêko gird virazenî. Roşanî ancax bi edalet, azadî û huzirî benî roşan. Cok ra ganî ma no roşan de gonîwerê ke sereyê dîn û mîlletê ma ser o bîyî bela, sindoqan de bifetisnî û înan ra hesab bipersî. Ma roşanê Remezanî yê heme muslumanan pîroz kenî û ma hêvî kenî ke no roşan bibo wesîleya ameyeyêko bêşer û bêdagîrkerîye.”
Ma roşanê heme şaran pîroz kenî
Konseyê Îdareyê TEV-DEMî zî mesajê xo de roşanê heme muslumanan pîroz kerdo û wina vato: “Hêrişê dewleta tirkî ver şarê herême prosesêko zehmetin ra derbaz beno. Sûrîye bîya waro ke dewletê teberî plan û programê xo yê dagîrkerîye eştî dewre. Ma do vera heme hêrişê ke şaran hedef gênî de bivinderî. Wa heme hetî seba bicaardişê hêvî û waştişê şarî, mîyanê têkoşînê demokrasî û azadîye de ca bigîrî. Manaya Roşanê Remezanî kûr û qîmetin o. Labelê şarê ma polîtîkayanê xiraban yê herême ver nê roşanî çadiran de derbaz keno. Ma sere de roşanê keyeyê şehîdan û yê heme muslumanan pîroz kenî.”
MERKEZÊ XEBERAN