Ser sînorê Rojhelat û Başûrê Kurdistanî de erdlerzo ke merkezê ci Silêmanîye yo û şîddetê ci 7.3 o, qewimîya. Erdlerz saete 21.18î de qewimîya û Rojhelat, Rojawan û Vakur de xeylê bajar û qezayanê Kurdistanî de ame hîskerdiş. 

Labelê bilançoya erdlerzî her ke şono giranêr beno. Heta nika tena bajarê Kirmanşanî de 372 kesî merdî û nizdîyê 6 hezar kesî zî birîndar bîyî. Kirmanşan de seba 3 rojan şîn ame îlankerdiş. 

Babete ser o KCK, KCDK-E û Heyva Sor a Kurdistanêyî îzehet dayî. Hemserekîya Konseyê Caardişî yê KCKyî derheqê erdlerzî de îzehetêko nuştekî weşênaye. KCKyî dîyar kerd ke erdlerzî ver bi seyan merdimî merdî û bi hezaran kesî zî birîndar bîyî; ma şarê Kurdistanî rê serweşî wazenî û birîndaran rê şifa wazenî.



Wa heme dinya rê bibî finak

KCKyî dewamê îzehetê xo de vato ‘ma veng danî heme parçeyanê Kurdistanî û şarê xo yê Ewropa, wa bi hawayo lezabez Rojhelat û Başûrê Kurdistanî reyde piştîdayîşêyewbînan ronî’ û îzehet wina dewam kerdo: “Wazenî wa hêrişan ver wazenî wa erdlerzî ver ganî şarê ma ra ti kes teber de û vêşan nêmano. Dejê kesêkî dejê ma yê hemînan o. Ganî ma paweyê ti hêzê teberî de nêvinderî û birînanê xo bi xo bipêşî. Lazim o ma no het de heme dinya rê bibî finak û piştî bidî şarê xo yê ewja. Cok ra ganî herkes xo rêxistine bikero û hetkarîye bido şarê ma.”



Wa bikewî têgêrayîşî mîyan

Dîvanê Hemserekîya KCDK-Eye zî seba erdlerzî mesajêko nuştekî da û wina va: “Netîceyê madî û manevî yê erdlerzî do çend rojî ra dima bi hawayo zelal bêro dîyayîş. Ma sey KCDK-E kesê ke merdî rê Homayî ra rehmet û birîndaran rê zî şîfa wazenî. Ganî hêzê mîyanneteweyî û şarê ma bikewî mîyanê têgêrayîşî û hetkarîye bidî şarê ma yê ewja.” 


Wa destê xo derg bikerî

Heto bîn ra Dezgehê Heyva Sor a Kurdistanê zî seba erdlerzî veng da şarê Kurdistanî û karmendanê Ewropa û piştîdayîşê yewbînan waşt.  Dezgehî îzehetê xo de vato ‘12ê Teşrîna verêne de erdlerzo ke şîddetê ci 7.3 o qewimîyayo’ û wina dewam kerdo: “Bajarê Kirmanşanî de bi seyan kesî merdî û nizdîyê 3 hezar kesî birîndar bîyî. Eynî wextî de bi hezaran keyeyî zirar dîyî. Ma sey Heyva Sor a Kurdistanê saetanê sifteyînan ra nata kewtî têgêrayîşî mîyan. Goreyê nê nika seba betanîye û lazimîyê heyatî xebatê ma dest pêkerdî. Ma do lazimîya şarê xo yo madî pê bîyarî. Na çarçewa de wa karmend û şarê ma yo Kurdistan û Ewropa piştî bidî şarê ma.”


Dezgehî seba hetkarîye adres û telefonê xo zî pare kerdo. Goreyê ci melumatê têkilîye wina yo: 

“Heyva Sor a Kurdistanê e. V. Wilhelmstr. 12, 53840 Troisdorf, hûmara telefonî: +49 (0) 2241 975 25 83, +49 (0) 2241 975 25 85, Fax: +49 (0) 2241 975 25 84, hûmara hesabî; Kreissparkasse Koln, 40 10 481, BLZ: 370 502 99, IBAN: DE 49 370 502 99 000 40 10 481, BIC/SWIFT: COKSDE33XXX.”


NAVENDÊ XEBERAN