Parlamenterê HDPyî Mîthat Sancarî va ‘nê îqtîdarî estena xo ser zure ra awan kerda’ û wina domna: “Seba ke HDP binê bendê weçînayîşî de bimano, heme çî kenî. Cok ra ganî herkes wayîrê sindoqan bivejîyo.” Xebatê ke seba weçînayîşê 24ê Hezîrane yenî kerdiş, bêmabên dewam kenî. Partîya Şaran ya Demokratîke (HDP) Kurdistan û Tirkîya de hewl dana xo biresno heme dewe, qeza û bajaran. Her roje cayanê cîya-cîyayan de akerdişê buroyî, kombîyayîşê şarî, zîyaretê esnaf û keyeyan, mîtînge, şayî û aktîvîteyê tewir bi tewirî yenî viraştiş. Çarçewaya xebatan de heta nika çend bajaran de mîtîngî ameyî organîzekerdiş û bitaybetî Cizîr, Colemêrg û qezayê Gêl û Pîranî yê Amedî de bi deshezaran kesî beşdarê mîtînge bîyî. Nika zî seba mîtînganê bînan amadekarîyî yenî kerdiş. Namzedê HDPyî Anqara de bi rêxistinê sîvîlî yê demokratîke reyde ameyî têhet. Şar eleqeyêko gird nîşanê xebate da û pêvînayîş de seba wayîrvejîyayîşê sindoqan veng ame dayîş. Namzedê HDPyî Fîlîz Kerestecîoglu, Velî Saçilik, Nuray Turkmene û Parlamenterê HDPyî Mîthat Sancar beşdar bîyî. Ewil sînevîzyono ke qiseykerdişê Selahattîn Demîrtaşî tede estbî, ame nawitiş. Sancarî qisey kerd û destpêkê qiseykerdişê xo de bi Erebkî, Kurdî û Tirkî beşdarvanan silam kerd. Sancarî wina va: “Tena AKP û Erdogan nê, heme kadroyê dewlete HDP ra tersenî. Cok ra netîceyê weçînayîşê 7ê Hezîrane qebul nêkerdî û şer dayî destpêkerdiş. Herçiqas ke nika heme çî dagîr kerdî zî, labelê nêşênî welat îdare bikerî.” Ganî ma wayîrê sindoqan bivejyî Sancarî derheqê ewleyîya weçînayîşî de wina va: “Weçînitoxê ma ê baş nas kenî û zanî. Îqtîdar hewl dano ke weçînitoxanê ma asteng bikero. Nînan de hîleyî zaf î. No îqtîdar estena xo ser zure ra awan kerda. Seba ke HDP binê bendê weçînayîşî de bimano, heme çî kenî. Cok ra ganî herkes wayîrê sindoqan bivejîyo. Serekkomar Erdogan talîmat da û Pirsus de merdimî ameyî qetilkerdiş. Ma do bi keda şarî aştîye awan bikerî.” 25ê Hezîrane de do biqedyî Namzedan ra Velî Saçilikî zî va ‘ma do 25ê Hezîrane de beton nê zîhnîyeto ke ciwananê ma qetil keno ser o birijnî’ û wina domna: “Pirsus de 33 ciwanê ma qetil kerdî, ewro eynî senaryo domnenî. Namzedê ma Selahattîn Demîrtaş vano ‘xo rîsiya meke’. Ma zî tîya ra vanî ma do çi Demîrtaş û çi zî şarê xo rîsiya nêkerî. Ma do 24ê Hezîrane de AKP bierzî cayê eşteyî yê tarîxî.” Namzede Nuray Turkmene va ‘anqarayijî eleqeyêko gird nîşanê înan danî û ez bawer kena ke ma do serbikewî’. Ma vengê herême yî Kerestecîogluye zî wina qisey kerde: “Ma vate û temsîlkarê herêman î. Herême nêbo, çîyêk nêbeno. Armancê ma o yo ke ma herêman bihêz bikerî. Eke sîyasetê herême bihêz nêbo, yew Erdogan şono, Erdoganêko bîn yeno. Eke ma qerarê xo bi xo nêgîrî, o wext Tirkîya do eynî rayîr de şêro. Cok ra partîya ma heme reng, bawerî, ciwan û cinîyan gêna mîyanê xo. HDP seba ke wina kena, bedel dana.” MERKEZÊ XEBERAN