Hemserekê KODARî Fuat Berîtanî derheqê krîzê Îranî de qisey kerd û bale ant ser çareserîye ser. Berîtanî va ‘komelê Îranî ganî seba nasnameyê xo yê komelkî û sîyasî têkoşîn bidî’ û wina domna: “Ganî heme hêzê kurdan yê Rojhelatê Kurdîstanî, platformêk de bêrî têhet û yewîya xo awan bikerî.”
Îran de demêko derg o hetê komelkî, ekonomî, sîyasî û sewbîna xeylê hetan de krîzî yenî cuyayene û 7 serreyî ra heta 70 serreyî herkes vera rejîmî de reaksîyonin o. Cok ra heta nika şar bi rojan çalakîyî viraştî û hêrsê xo nîşanê rejîmî dayî.
Hemserekê sîstemê Komelê Azade û Demokratîke yê Rojhelatê Kurdistanî (KODAR) Fuat Berîtanî qisey kerd. Berîtanî dîyar kerd ke rayîrê derbazkerdişê krîzî fek zîhnîyetê verên ra veradayîşî ra derbaz beno û wina domna: “Eke Komara Îranî zîhnîyetê xo yê verên de israr bikero, ma sey KODARî do qet nêbî parçeyê prosesêkê winasî.”
Berîtanî va ‘şert û mercê ke estî reyde dewam kerdene yan zî teber ra tayê çîyan hêvî kerdene, xo reyde tayê krîzan ano’ û wina dewam kerd: “No het de Sûrîye nimune ya. Xeta 3. hertim bedilnayîşan xelq kena û nêverdana ke krîzî zêde bibî. Îran de zî şert û mercê estî reyde dewam kerdene, çîyêko trajîk o. Krîz û kaosî estî û rayîrê derbazkerdişê krîz û kaosan fek zîhnîyetê verên ra veradayîşî reyde mumkin o. Eke Îran fek zîhnîyetê kehenî ra veranêdo, KODAR do nêbo parçeyê nê prosesî. Demokratîkbîyayîşê Îranî de rol keweno milê şar, cinî û roşnvîran ser.”
Hetgirê demokrasîya radîkale yo
Berîtanî dewamê qiseykerdişê xo de wina va: “Hêzo ke komelî esas nêgîro û heme çîyê xo seba îqtîdarî bikar bîyaro, o wext nêşêno kategorîya demokrasî de ca bigîro. Şertê prosesê demokratîke esasgirewtişê komelî yo. Komel ancax bi yewîye û demokratîkbîyayîş, eşkeno bedilîyayîşan îqtîdarî ser o bido ferz kerdene. Îqtîdar zî ganî îradeya komelî bişinasno. KODAR partîyanê bînan ra cîyayêr hereket keno. KODAR hetgirê demokrasîya radîkale yo û seba nêyî têkoşîn dano. Ganî kurdî vera înkar û tehdîdan de sere nêronî û xo bipawî.”
Ti dewlete bi îşkenceyî sernêkewto
Berîtanî da zanayene ke ganî kurdî seba nasnameyê xo yê komelkî û sîyasî têkoşîn bidî û wina qedêna: “Eke kurdî rêxistinbîyayîş de zeyîf bibî, o wext nêşênî xeta xo ya xopawitişî bihêz bikerî. Eke Îran krîz nêwazo, ganî sere de yê kurdan û problemanê heme şaran çareser bikero. Nêke teslîmîyet bido ferz kerdene, o wext no seba rejîmî tehlukeyin o. Heta nika ti dewlete bi zîndan û îşkenceyî sernêkewto. Ganî heme hêzê kurdan platformêk de bêrî têhet û yewîya xo awan bikerî. Ma Sûrîye de zî dî ke hêzê teberî wazenî krîzan zêde bikerî.”
MERKEZÊ XEBERAN
Seba krîzî ra vejîyayîşî lazimîye bi yewîye esta
Endama Merkezî Partîya Kedkare û Şorişgêrî ya Kurdistanî Kewser Fetahîye dîyar kerde ke seba bi hawayo bihêz krîzî ra vejîyayîşî lazimîye bi yewîya îttîfaqê kurdan esta û wina dewam kerde: “Aşma ameyeye de ambargoya Amerîka do Îran ser o xo nîşan bidî. Rejîmê Îranî zî Rojhelatê Kurdistanî ser o ambargo ronayo. Prosesêko winasî de lazimîye bi yewîya kurdan esta. Ganî Rojhelat de xetabêka kolektîfe bêro kerdene. Qet şik çin o ke waştişê şarî zî no yo. Cinîyî vera neheqîyan de bi hawayo bihêz vindenî û no zî tesîrê xo nîşan dano.”