Başûrê Kurdistanî de vera hukmatê herême de serewedarnayîşê şarî roja 4. de dewam keno. Seke yeno zanayîş şarî seba ke hukmat îstîfa bikero, 15 cayan de dest bi çalakîyan kerdbî. 

Bajarê Silêmanîye û dormeyê ci de bi hezaran kesî vejîyayî ziqaqan, waştî ke hukmat îstîfa bikero. Hêzê asayîşî hêrişê çalakgêran kerdî û netîceyê hêrişî de 7 kesî merdî û bi seyan kesî zî birîndar bîyî. Bitaybetî qezaya Ranya ya Silêmanî de netîceyê hêrişê hêzê asayîşî de 6 kesî merdî û 150 kesî zî birîndar bîyî. Birîndaran ra rewşa tayînan giran a. Ame musayîş ke hêzê pêşmergeyî saetanê şanî de xo tepîya antî. Labelê Kifrî û Çemçemal de qedexeyê tebervejîyayîşî ameyo îlankerdiş. 

Heto bîn ra hêzê asayîşî Koye de zî hêrişê çalakgêran kerdî û netîceyê hêrişî de kesêk merd û bi desan kesî zî birîndar bîyî. Badê ke çalakîyî vila bîyî, hêzê asayîşî eştî Televîzyonê NRT TVyî ser de û weşanê televîzyonî vindarnayî. Heto bîn ra Serekê Tevgerê Neslo Newe Şaswar Abdulwehîdo ke Londra ra agêrayêne Silêmanîye û Parlamentero xoser yê Başûrê Kurdistanî û Endamê Tevgerê Neslo Newe Rabûn Mehrûf Silêmanî de ameyî tepiştiş. 


Zaf kesî zî bi guleyî birîndar bîyî

Silêmanî de netîceyê Hêzê Asayîşî de zaf kesî birîndar bîyî. Muxabîrê Rojnewsî Rêzan Mihemedî dîyar kerd ke zafê çalakgêran bi guleyan birîndar bîyî. Berpirsîyarê Beşa Lezgîne ya Nêweşxaneyê Silêmanî Ûmêd Elîyî ard ziwan ke heta nika 8 birîndarî ardî nêweşxane û nînan ra rewşa 6 kesan baş a. Herêma Qeladizê ya Silêmanî de 12 kesî netîceyê çalakîyan de ameyî tepiştiş. 

Beldeyê Şarezûr û Warma de zî çalakgêrî vejîyayî raşteyan û rayîrê Derbedîxan û Silêmanî trafîkî rê padayî. Çalakgêran bi sloganê ‘Wa birijîyo îqtîdar’ vejîyayî ziqaqan. Çalakgêran sloganê ‘Wa hukumranîya 26 serran biqedîyo’, ‘hukmat îstîfa’ û sewbîna eştî. 


Îzehetê hukmatî

Hukmatî îzehetêk da û waşt ke wa çalakîyan de bînayê hukmatî nêrî veşnayîş. Labelê zaf cayan de bînayê PDK, YNK, Goran û bînayê fermîyî ameyî veşnayîş. Neçîrvan Barzanîyî zî îzehetêk da û waşt ke herkes wa hesas têbigêro. Meclîsê Başûrê Kurdistanî zî îzehetêk da û waşt ke wa çalakîyî bi hawayo aştîye bêrî kerdiş. Heto bîn ra Serekwezîrê Iraqî Haydar Abadîyî zî îzehetêk da û va ‘eke çalakgêrî zirar bivînî, ma do mudaxale bikerî’. Reyna çalakîyan ra dima nika Hemserekê Tevgerê Azadî yê Silêmanî Azad Omerî ra ti xebere nîna girewtiş. 


Cepheyê Şarî zî destek dano şarî

Cepheyê Şarî yê Demokratîke (Bereya Demokratîk a Gel) zî derheqê çalakîyan de îzehetêk da. Cepheyî îzehetê xo de wina va: “Ma destek danî çalakîyanê şarî. Nê protestoyî netîceyê waştişê şarî de dest pêkerdî. Seba ke îqtîdarî goş nêda waştişê şarî, şarî muracatê çalakîye kerd. Ma waştişanê heqdaran yê şarî rê wayîr vejîyenî. Ma zî parçeyeyêkî nê xoverdayîşî yî. Hêrişê çalakîyanê protestoyî yê şarî kenî û no nîno qebulkerdiş. Şîddet hetê zordestan ra yeno bicaardiş, hetê şarî ra nê. Nê hedîseyî netîceyê nizdîbîyayîşê îqtîdarî de wina bîyî.”


NAVENDÊ XEBERAN