Dijwerê çeteyê DAIŞî têkoşîna hêzê YPG/YPJ bi coş û heycan domyeno, ewro têkoşîna hêzê Kobanê roje 75’ê ra kewt. Hêrişê çeteyê DAIŞî ser, nika di Kobanê de cayêke nêrijyayo çin o. Taybetê rijyayiş rojhîlat û vaşûrê şaristanî de zaf o. Nê rijyayişan zî hêrişê çeteyê DAIŞî û bomberan kerdişê hêzê koalîsyonê ra qewimyeno. Nê xirapbîyîşê ser zî karkerekê Berpirsîyarê ya Karê Xizmetî yê Kantona Kobanê ra giredayî destpê pankî kerdî. Nê karkeran di rayîrê wesayîteke çewt bîyê hawanenî, banê ke rijyayo tamîr kenî. Heme nê xizmetî zî bi îmkanê xo kenî.

Her karê ra vazdonî
Kobanêyijan, berpirsîyarê Karê Xizmetî yê Kantona Kobanê Sadiq Eldemîrî, bi nameyê Bavê Botan de şinasnenî û Eldemîr xebatan ser agahî da. Eldemîr dîyar kerd ke şerê ser karê înan bedilyayo û wina vat: “Di zaf hûmarîy de embaze ma ke şaredarîye de xebityenî, di noca de nîyê, çi ma ra yeno se waştiş, ma bi îmkanê xo daxîl benî. Çi ma ra ame waştiş, finak, elektrîk, akaryakit û tamîrê wesayîtê ma heme bi destê xo kerdî. Di aşm ra zaf şer domyeno.”
Eldemîr aşkera kerd ke ê rojbiroj xebatê xo averbenî û wina domna: “Nika hûmarê ma 30 kes o, ma taybetî tamîrkerdişê wesayîtan yew kom ronay. Hewna ma seba pirsgirêkê ceryanî û pankîya şaristanî ser yew kom ronay. Seba temînkerdişê akaryakitî ser zî yew kom ronay. Xebatê ma bi zehmetî de vîyareno, rayna ma nêeşkenî biresî. Kêmasî ma est o la bi zehmetî zî bibo ma karê xo domnenî. Ma wazenê karê xo bi rayvistişê bidomnî. Ma di roj de yew pankîya şaristanî ser çopan kom kenî û pankî kenî.”

Lazimeya sivîlan estî
Eldemîr destnîşan kerd ke verba kobanêyijan çeteyê DAIŞî şerekê zaf bi leymin şuxulnenî û wina dewam kerd: “Her roj çeteyê DAIŞî ser ma bi hawanan hêriş kenî, di zaf hûmarîy de wesayît û banê ma veşayo. Ma nika nê wesayîtan kom kenî û banan zî tamîr kenî. Di zaf hûmarîy de sivîl nika Kobanê de est î û ma lazimeya înan a nanê wazenê verba bikerî. No ser zî ma nika xebatê warê kenî. Verên vatî di Kobanê de sivîl çin o la nika her kes zaneno ke di Kobanê de sivîl est î û lazimeya nê sivîlan zî est o. Sifteyin nan, awe, mazot û elektrîk est o ma zî nê xizmetan verba kenî. Sewbî lazimeya înan zî endamê Mala Gel verba kenî la warê xizmetî ma verba kenî.”
Hewna Fethî Mîsîro zî destnîşan kerd ke nika di Kobanê de şerekê zaf dijwar est o û wina domna: “Ma noca verba terorekê gird vindertî. Ma zî seba şarê sivîl fikrîyaye; ma senî şarê xo ra xizmet bikerî, ma zî no rayîrê xo ra finak girewtî. Şerwanan lazimeya xo vînenî la sivîlan nêeşkenî lazimeya xo verba bikerî. Xebatê ma taybetê lazimeya sivîlan ser o. Çimkî di zaf hûmarîy de doman, extîyar û cenî est î û sifteyinî ma zî sivîlan o.”

Ê birijnî zî ma înşa bikerî
Hemed Seydî zî seba Kobanê bi zerrî di karê xizmetî de xebityeno û ey zî vat ke çeteyê DAIŞî amey û welata înan rijnay û no ser zî ganî înan newe ra welata xo înşa bikerî û wina vat: “Çimkî Rayverê ma vana ke azadî înşabîyîşê welate ra vîyarena. No ser zî ma zî bixebitê û înşa bikerî. Ê rijnay ma hîna weş û gird înşa bikerî, çimkî no ser îrade ma est o. Senî ke şerwanê ma verba nê çeteyan têkoşînake gird danî, ma zî bi îradeya xo noca înşa bikerî. Ganî seba hetkarî korîdor bêro akerdiş. Nika lazimeya şarê ma zaf o û noca saxlam çik nêmendo.”

Şarê vakurî  ma ra zaf hetkarî da
Eldemir ciresna ke nika ê ravêreyeyeke zehmet ra vîyarenî, çimkî di Kobanê de zaf cenî, doman û sivîl est î û mîyanê zehmetî de cuyenî û wina donma: “Ganîyo ke heme dinya na rewşe bivîno. Teber ra çeteyan amey û wazênê welata ma, ma ra bigêrî. No ser zî şarê ma têkoşîn danî.  Ez kesekê Kobanê ra şîyê, înan ra veng dana û vana ke şima nêeşkenî bi axê biciwî û biagêrê axê xo. Çimkî her kûçe û kerra de vîrê şima est o. Ganî kobanêyijan axê xo ra biagêrê û tewt hutelek kar ra tewr gird kar de wezîfe bigêrî.”
Eldemîr aşkera kerd ke ganî şarê ma raşteyê Kobanê ra biagêro û bi no rayîrî zî çeteyê DAIŞî bitersî, taybetê şarê vakurî ra spas kena.

Hetkarîyê înan seba ê zaf bi watedar bi û wina donma: “Şarê vakurî qet domananê ma bêwayîr nêveraday. Verba no nêzdîbîyîşê şarê vakurî ma zî ganî xizmetî xo ra hîna weş bikerî. Ganî şarê dinya bizaneke, di dijverê ma de nayareke zaf barbar est o, no ser zî ma ganî verba nê çeteyan têkoşînake hîna gird û weş bidî. Kesekê hetê demokrasîyî ganî ma ra hetkarî bidî, çimkî çeteyê DAIŞî dinyaye ra nêyarî kenî.”




ERSÎN ÇAKSU - ÎBRAHÎM ASLAN / DÎHA / KOBANÊ