“No semedî ra zî lazim o heme Turkîyeye goş bido vengê aştîwaştişê kurdistanijî. Sebrê kurdan sero na ravêreyeye de zaf ame kaykerdiş. Êdî maseya muzakereye ke ameya qelibnayîş, lazim o hewna bêra raştkerdiş.”
Wa êdî dej nêrî cuyayiş
Hunermend Zelal Gokçe qetlîyama aşma kanun a 2011’î de ke 34 welatijî cuyeyê xo tede vinî kerdî ard vîr û wina verdewam kerd: “Eyro rayna ma dekewtî mîyanê ravêreyeya şerî. Waştişê ma yê bingeyîn no yo ke wa êdî hesrê çiman bivindero û derheqê dejî de wa çîyek nêro cuyayîş. Ger ke semedê vindarnayîşê şerî de yew omidek zaf wirdêlek zî bibo, ma wazenî aye omid bixebetnî. Nêy dejî semedê ke Kurdistan de yenî cuyayîş, tena aîdî Kurdistanî nîyî. Lazim o waştişê aştîye ya kurdan tena yew hetî ra nêmano, sey waştişê pêroyîn bêro destgirewtiş. No hetî de lazim o hunermendî vengê xo berz bikerî.”
Aştîyeka rumedar şert a
Hunermend Nurcan Degîrmencî zî bal ant ser têkoşînê azadîya şarê kurd û wina vat: “Semedê ke têkoşînê azadîye ke şarê kurd dano, hetê dewletî ra nêame hazimkerdiş, dewlet konseptê şerî vist dewreye. Şero ke yeno cuyayîş, yê şaran nîyo; şero ke îqtîdar dijî şaran dayo destpêkerdiş o. 30 serrî ra vîşer o ke no şer esto. Lazim o merdimî zî goreyê no haydar bibî û dijî şerî vengê xo bivejî.
Wa çew ma bander nêkero
Degîrmencî qalîkerdişê xo de derheqê waştişê aştîye de ciresna ke êy aştîye ke hetê di hetî ra ameya qebulkerdiş wazenî û qalîkerdişê xo wina peynî kerd: “Ma aştîyek ke heme şertê ci amey qebulkerdiş wazenî. Ger ke biwazî eşkenî no şerî yew rojî de biqedênî û Îmralîye reyde zî pêvînayîş bikerî. Êdî lazim o maseya muzakereye ke ameya qelibnayîş rayna bêro raştkerdiş.”