Bi serran o vera çapemenîya muxalîfe de zext û tedayî estî û çapemenîya azade vera nê zext û tedayan de hertim xeta xo pawita. Tewr peynî qayûm tayînê rojnameyê Ozgurlukçu Demokrasî bibî û xebatkarê ci ameybî tepiştiş.
Vera zext û tedayan de 2 rojnameyê neweyî dest bi weşanî kerdî. Rojnameyê Yenî Yaşam û e-rojname prosesêko winasî de dest bi weşanî kerdî. Çapemenîya azade ke her şert û merc de xeta Apê Mûsa û Gurbetellî Ersozan pawite, bi no hawa yewna rey vindetişê xo nîşan daye.
Hûmara yewine ya rojnameyê Yenî Yaşamî bi manşete ‘Fatûraya ci şarî rê birîyena’ weşanîyaye. Kadroyê nuştoxan mîyan de kesê sey Yildirim Turker, Celal Başlangiç, Mucella Yapici, Beyza Ustune, Murat Uyurkulak, Eren Keskîne, Fîkret Başkaya, Dîren Cevahîr Şen, Nesrîn Nase û sewbîna kesî estî.
Ma do raştîye biresnî şarê xo
Hûmara yewine ya rojnameyî de rîpela yewine de nuşteyê edîtorî ra ameyo nuştiş. Nuşteyî de wina ameyo vatiş: “Merheba Yenî Yaşam. Ma sey nameyê xo îdîayin î. Rojnamegerîye cuye bi xo ya. Bawerîya ma bi renginîya cuye û cuya azade esta. Ma seba cuyêka newe vejîyenî rayîr. Ma bi Yenî Yaşamî game erzenî çapemenîye mîyan û ma zanî ke cuyêka zehmetine ya. Beno ke gama ma ya sifteyîne ba, labelê ma bi rojnamegeranê tecrubeyinan game erzenî. Ma do xo biresnî raştîye û raştîye biresnî şarê xo. Ma do kedkarîya nêyî bikerî. Yenî Yaşam yena manaya wayîrvejîyayîşê azadîyan. Yenî Yaşam yena manaya ehlaqê çapemenîye ra tavîz nêdayîşî. Wa rayîrê şima, rayîrê ma akerde bo.”
E-rojname zî dest pêkerd
Heto bîn ra rojnameyê bi nameyê e-rojname zî înternet ser ro dest bi weşanî kerd. Badê ke welatê rojnameyê Welatî ame vindarnayîş, keyepelê e-rojname dest bi weşanî kerd. Keyepelê e-rojname http://www.e-rojname.com yo û bi manşete ‘Kurdî sînoran nas nêkeno’ dest pêkerd. e-rojname bi lehçeyanê Kirmanckî û Kurmancî dest pêkerd.
Bibê abone û aboneyan peyda bikerê
Nuşteyê edîtorî ra yê rojnameyî de ameyo vatiş ke ‘seba ke ma rojnameyê kurdî reya sifteyîne bi hawayo dîjîtal weşênenî, biheyecan î’ û wina dewam kerdo: “Raywanîya rojnamegerîya kurdî 22ê Nîsana 1898î de dest pêkerde û 120 serrî yo dewam keno. Heta nika no oxir de xeylê bedelî ameyî dayîş. Wezîfeyê ma yo esasî o yo ke ma bi ziwanê xo raştîyan biresnî şarê xo. Ma nika ra vanî na xebate ancax bi destek û hêzê wendekaran aver şono. Seba taqîp û wendişî bibê abone û aboneyan peyda bikerê.”
MERKEZÊ XEBERAN