Înîsîyatîfê Rojnamegerê Azad derheqê zêdebîyayîşê zext û tedayan de Şûbeya Amedî ya Komeleya Heqê Merdiman (ÎHD) de îzehetêk da çapemenîye. Îzeheto ke xeylê rojnamegerî beşdar bîyî de, dovîzê tirkî û kurdî ke ser de ‘Rojnamegerî suc nîya’ û fotografê Rojnamegero fransayî Mahîas Depardonî ameyî kiriştiş.
Îzehet de Verfekê Însîyatîfî Hakki Boltanî qisey kerd û wina va: “Depardon seba ke fotografan bianco amebî bajarê Êlihî û ewja de ame tepiştiş. Depardon nika kewto grevê vêşanî. Nê kerdişê ke vera rojnamegeranê xerîban de benî, nînî qebulkerdiş. Bi no hawa hewl danî çîyê ke herême de qewimîyenî, rayapêroyî ya dinya ra biniminî. No hetê azadîya çapemenîye de suc o.
Tewqîfkerdiş suc o
Boltanî va ‘Tirkîya de bi seyan rojnamegerî seba ke tena karê xo kerdî, tewqîfkerde yî’ û wina dewam kerd: “Rojnamegerî suc nîya. Tewqîfkerdişê rojnamegeran suc o. Tirkîya bîya zîndanê rojnamegeran û îqtîdar zî bîyo gardîyan û mudirê nê zîndanî. Tirkîya de 169 rojnamegerî zîndan de yî. Her çiqas ke zext û tedayî zêde bibî, reyna zî do çapemenîya azade nêvindero.”
Ma rojnameger î
Îdarekarê DÎSK Basin-Îşî Aydin Nadîrî zî va ‘Tirkîya bîya zîndanêko akerde’ û wina domna: “Heqê girewtişê xebere yê şarî destê înan ra yeno girewtiş. Ma tîya de tena heqê rojnamegeran nê, heqê girewtişê xebere yê rojnamegeran zî pawenî. Tirkîya de zaf rojnamegerî raştê qetlîyamê ke kerdoxê înan dîyar nîyî ameyî. Goreyê kerdoxê înan dîyar î. Ma ti kesî ra nêtersenî. Ma rojnameger î. Heta ke embazê ma zîndan de bibî, ma zî azad nîyî.”
DÎHABER / AMED