Seke yeno zanayene Ajansê Xeberan yê Firatî (ANF) ke bi xeylê ziwanan xizmetê şarê xo keno, 15ê êlule de bi kirmanckî zî dest bi xizmetî kerd. Abîyayîşê beşê kirmanckî xeylê kesan de kêfweşîye viraşto.
Nuştox Azad Ararat û nuştox û rojnameger Wusênê Gestemerde derheqê abîyayîşê beşê kirmanckî yê ANFyî ser o hîsê xo ardî ziwan.
Nuştox Azad Araratî abîyayîşê beşê kirmanckî yê ANFyî ser o va ‘Tevgerê Azadîye cuya kurdan de xeylê vurnayîşî ameyî kerdî’ û wina dewam kerd: “Bitaybetî hetê çapemenîye de xeylê vurîyayîşî ameyî kerdene. Nînan ANF demêko derg o no het de xizmetê şarî keno. Abîyayîşê kirmanckî herçiqas ke erey bo zî seba şarê ma yê kirmancî zaf hol o, gamêka muhîme ya. Ez kesê ke keda înan esta û kesê ke nika gurîyenî rê serkewtiş wazena. Înan pîroz kena û çi destê mi ra bêro ez do bikera. Bitaybetî ez do xeberan biruşna înan rê. Bitaybetî kesê ke Unîversîteya Artuklu de wendî û tez amade kerdî zî eşkenî hetkarîye bikerî. Ganî ma wina bikerî ke ANF seba averberdişê kirmanckî rolêko rind kay bikero û bibo wesîleya averşîyayîşan.”
Azad Ararat
Na game zaf qîmetin a
Nuştox û rojnameger Wusênê Gestemerdeyî zî wina va: “Wareyê kirmanckî de na xizmete xizmete de qiymetin a. Seke êno zanitene Ajansê Xeberan yê Firatî (ANF) bi zaf ziwanan xizmete de zaf hewl û zaf kî xizmete de rinde keno. Xizmetê ANFyî ra yew kî bi ziwanê kirmanckî dest bi weşanî kerdene bîye. Raştî kî ez bi nameyê xo zaf bîya kêyfweş, ke ewro êdî bi ziwanê ma xizmete de zaf rinde û xizmetede profesyonele êna kerdene. Wareyê kirmanckî de nê xebatê nîyanênî zaf hêca yê, zaf kî delal ê. No semed ra kî ez kedkaranê ANF Kirmanckî fîraz kena û nê xebatê hêcayî de înan rê serkewtene wazena. Ma kî gere verba nê zulmî de xover bidîme û bi raya demokrasî mucadele bikerîme. Qet bêguman bîr û bawerîya mi awa ke Ajansê Xeberan yê Firatî bêşê kirmanckî de seba qomê ma xizmeta de bêqusire û hêcayê ano sere. O waxt ma kî bêguman benîme teqîpkerdoxê ANF Kirmanckî.”
ANF / BRUKSEL