TAHÎR ÎBRAHÎM / ROJNEWS/RANYA
Başûrê Kurdistanî de şar vera polîtîkayê sîyasî, ekonomîk û leşkerîye yê hukmatî de 18ê Kanûne de serewedarnayîş dabî destpêkerdiş û serewedarnayîş roja 5. de dewam keno. Şar wazeno ke hukmat îstîfa bikero. Vizêr welatîyan qezaya Ranya ya Silêmanî de vejîyayî raşteyan. Ame musayîş ke Hêzê Asayîşî bi sîlehan hêrişê çalakgêran kerdî.
Heto bîn ra Hemserekîya Konseyê Caardişî ya Komeleyê Komelê Kurdistanî (KCK) zî babete ser o îzehetêk da. Hemserekîya KCKyî îzehetê xo de dîyar kerdo ke şarêk seba demokratîkbîyayîşî werişto payan ser û wina dewam kerdo: “Ma heme keyeyê ke merdimê xo vînî kerdî rê serweşî wazenî. Cok ra şar nîşan da ke sîyasetê Başûrî ra kêfweş nîyo. Nika eşkenî komîte yan zî komîsyono ke mîyan de partîyê sîyasî, rêxistinê komelî û sewbîna ca gênî, awan bikerî û na komîte her ca de şarî reyde bêro têhet û kombîyayîşan virazo. Ma na çarçewa de veng danî heme hêzanê sîyasîyan ke wa seba îstîkrarê Başûrê Kurdistanî hewl bidî.”