20ê Hezîrane sey Roja Bexwaştoxanê Dinya yena pîrozkerdiş labelê dinya de bi mîlyonan merdimî şer, pêrodayîş, vêşanî, xela û cîyakerdişî ver cografyaya xo teriknenî. Goreyê daneyê Miletê Yewbîyayeyî (MY) 65 mîlyonî bextwaştoxî estî.Babete ser o Hetkarê Serekê Komeleya ‘Halklarin Koprusu’ Yildirim Şahînî qisey kerd.
Şahînî va ‘merdimî xo bi xo Afganistan, Lîbya û Sûrîye ra nêweriştî û nêvatî; haydê ma şêrî Tirkîya yan zî Ewropa de bicuyî’ û wina dewam kerd: “Merdimî şert û mercanê şerî ver, seba ke bişînbî bicuyî ameyî. Nika Tirkîya de 3 mîlyonî ra zêde bextwaştoxî estî, labelê yê ke kampan de manenî, hûmara înan 300 hezar daxî nîya.”
Dewletî nêvînena
Şahînî dewamê qiseykerdişê xo de va ‘Tirkîya de hetê bextwaştoxan de sînorkerdiş esto’ û wina domna: “Tirkîya de tena yê ke Ewropa ra yenî bextwaştox hesibîyenî. Yê ke Sûrîye yan zî Rojhelato Mîyanên ra yenî meyman hesibîyenî. Cok ra bextwaştoxî vera xo dayî Ewropa. Tirkîya zî nêyî vera Ewropa de sey qozêk xebetnaye. Ewropa zî no het de vano ‘wa teberê sînorê min de bibo, se beno wa bibo’. Hetta seba nêyî keştîyê şerî erşawîyayî. Nê keştîyî seba ke vernîya şîyayîşê bextwaştoxan bigîrî şîyî. La ê se bikerî nêşênî vernîya şîyayîşan bigîrî. Çimkî bextwaştoxî mîyanê cehenemî ra vejîyenî û seba ke cuyêka newe awan bikerî, kewenî rayîr. Cok ra ganî seba bextwaştoxan rayîrê biewle bêrî dîyayîş.”
DÎHABER/ÎZMÎR