Operasyonê Xezebê Firatî ke hetê Hêzê Sûrîyeya Demokratîke (HSD) ra amebî destpêkerdiş, merhaleyê xo yo peyên de taxa El Meşlebî de dewam keno. Nika tay mendo ke taxa El Meşlebî bêra xelisnayîş. Taxa El Cezra de mabênê hêzanê HSD û DAIŞî de pêrodayîşê girdî qewimîyenî. Çarçewaya pêrodayîşan de heta nika zaf hûmare de DAIŞî ameyî kiştiş û operasyon roja xo ya 5. de dewam keno. Nê rojanê peyênan de Rûsya îdîayêka ‘HSD û DAIŞ pêkerdî û cok ra korîdor ame akerdiş’ viste orte. Fermandaranê YPGyî ra Lokman Xelîlî derheqê nê îdîayanê Rûsya de qisey kerd û cewab da nê îdîayan.
Gamê tarîxî
Fermandarê YPGyî Xelîlî va ‘ma Operasyonê Xezebê Firatî de resayî merhaleyêko cîya’ û wina domna: “Ma merhaleyanê bînan bi hawayo serkewte derbaz kerd û ma nika resayî merhaleyo peyên ke ma sey ‘Şero Gird’ şinase kerd. Hêzê ma nika ver bi merkezê bajarê Reqqa aver şonî. Heta nika hêzê ma tay cayan de 2 kîlometre, tay cayan de zî kîlometreyêk aver şîyî.”
Xelîlî va ‘hedefê ma o yo ke ma merkezê bajarî azad bikerî’ û wina dewam kerd: “Ma kilîtê Reqqa destê ti kesî ra nêgirewto. Hêzê ma bi bedelanê girdan kewenî bajaro ke binê dagîrkerî de yo. Ma nêyî seba şaran kenî û nika ereb, kurd, tirkmen, çerkez û suryanîyî bîyî yewe û bi îmkananê xo hewl danî bajarî azad bikerî.”
Wazena kêmî bikera
Xelîlî qiseykerdişê xo de va qala îdîayê Rûsya zî kerd û wina va: “Nê îdîayî orte de gêrenî heme hetê Rûsya û tayê hêzê bînan ra yenî vatiş. Hedefê nê îdîayan o yo ke îtîbarê hêzê ke Reqqa azad kenî, hetê mîyanneteweyî de kêmî bikerî û bêtesîr bikerî. Ewro her kes zano ke kam DAIŞî reyde hemkarî keno û kam nêkeno. Şerwanê HSDyî her hetî de vera DAIŞî de têkoşîn danî. Şerwanê ma bi bawerîyêka girde aver şonî. Şerwanê ma her taxe, ziqaq û cadeyî bi netîceyê têkoşînêko gird rizgar kenî. Bi nê îdîayan hewl danî tesîrê operasyonê Reqqa kêmî bikerî.”
NAZIM DAŞTAN/DÎHABER/REQA