Endamê Gruba Yorumî çalakîya xo ya grewa vêşanî ya mergî domnenê, reyadarê Wazeretê Karanê Zereyî reyde heyetêk pêvînayiş kerd. Demê pêvînayişî zî rayedarê Wazaretê Karanê Zereyî vatî ke eke endamê Gruba Yorumî çalakîya xo ya grewa vêşanî ya mergî ra fek vera bidê do waştişê înan ser o bêro krîtîkkerdiş. Çalakîya Gruba Yorumî ser o Heyetê Bawerîya Komela Kultirê Pîr Sultan Abdalî aşkerayêk da. Aşkeraye ra sifte bi deyrê Neşet Ertaşî ame destpê kerdiş: “Şima kotî de kesêkî/e deyr vano/a dî, şîrê hetê ci biroşî, çimkî deyrê merdimê xirabî çin ê” Heqo cuya pîroz o Aşkera de wina ame vatiş: “Sey heme ozan û deyrbazan, endamê Gruba Yorumî bedel danê, endamê Gruba Yorumî vera teda û zilmî destpê çalakîya vêşanî ya mergî kerd, peynîya tehlîbîyayişî zî keyeyanê xo de çalakîya xo domnenê. Rewşa weşîya Mustafa Koçakî zaf bi xidar a, ganîya ke sazîya Tiba Edlî goreyê rewşa Mustafa Kolçakî raporêk bido. Bawerîya elewî, heme netewan seyyewbînan gîna dest, goreyê bawerîya elewî zî heqo cuya pîroz o. Pêroyina Dinya û Tirkîya de Vîrûsê Koronayî vila beno, no ser zî ma vanî ke nê rojê zehmetî encax bi rayîrî barkerde û piştîyewbînandayişî ma eşkenê bivîyarê. Ganî endamê Gruba Yorumî çalakîya xo ra fek vera bidê û waştişê înan zî bêro ca.” AMED