Yew merkezo ke Roşanê Newroz ame bimbarek kerdiş zî warê Şêx Seîdê Kal Çewlîg bi. Bi hezaran Çewlîgijê ke Newroz bimbarek kerdî mesajê ‘Nê’ day. Parlementera HDP Huda Kaya ke tewrê bimbarekîn bî aşkere kerd ke, Newroz, vera zilmê zalimê ke cuye ma açarnay cehenemî, roşanê çîçeganê xoverder ke vilê xo çot nîkerdî yo.
Şarê Çewlîg rixmê varon û hewayê serdin bi renganê xo û bi dowîzanê ‘Nê’ herikyay cayê bimbarekînî, Cehdeyê Nêweşxaneyî. Bimbarekîn bi vinderdişê hirmetî destpa kerd. Dima ra Serokê Komîyetê Hadreyîn yê Newrozî Siddik Yûrtsever’î qisey kerd û Newroz şarî rê bimbarek kerd.
Vera dehaqan têkoşînê Kawayan
Parlementera HDP Huda Kaya ke qisey kerd Newroza şarê Çewlîg bimbarek kerd. Kaya vist vîrî ke Newroz, vera dehaqan têkoşînê Kawayan o û va, “Newroz, vera zilmê yezîdan xoverdayîşê Huseyînan o. Newroz, vera zilmê zalimê ke cuye ma açarnay cehenemî, roşanê çîçeganê xoverder ke vilê xo çot nîkerdî yo.”
Huda Kaya herzewbîn hayr ant zextê vera mûxalîfan ser û hina dewam kerd: “Hikûmet pê pêrokîn îmkananê xo semedê manîkerdîşê kampanya ‘Nê’ kewta hereket. Televizyonan de her roj behsê yew yewî kenê. Wazenê ameyoxê ma mehkûmê yew yewî bikerê. Ma dê destûr nêdê nayî û bi ‘Nê’ bibê manî. Ma tenya wazenê pê rûmetê xo û azad bicuwe. Ma zey şima nefret, kîn û hêrsî nêwazenê, şerî nêwazenê.” Parlementera HDP Huda Kaya aşkere kerd ke şarê ke pê Newroz hişyar bî, dê 16ê Nîsan iyê dê peynîya hikmê zaliman bîyarê.
Endî dinya AKP qebûl nêkeno
Parlementera HDP yê Çewlîg Hîşyar Ozsoyî zî vist vîrî ke zimistan qedîya û wesar ame û aşkere kerd ke feyde yê tersî ecelî rê çin o. Ozsoyî ard ziwan ke Abbas raywan o, do şiro û hina va: “Nayî ra remayîş çin o. Vatişê înan rê emel mekerê, ê zûrrî kenê. Verîya 7ê Hezîranî vatî, dê bieşkê bê vîze şirê Ewrûpa, la nika wezîrî bi xo nêşkenê şirê Ewrûpa. AKP hinî dinya de nîna qebûl kerdiş. Eke wextê nezdî de Ewrûpa de birê binçim girewten, şaş memanê.”