Îtfaîyekaran ra gule
Ahmet Dîlek ke bi hetkarîya ciranê xo veşnayişî ra xelisya, qewimyayişê ame serî ci û malbatê ci qise kerd. Dîlek aşkera kerd ke roja diyin a qedexeyî bî, teqînek ame meydan, o, çar doman û birayê xo ra bi pêro hîrês kes zereyî ra nêvejîyayî teberî, peynî zî polîsî ser banê înan bombe eştî û wina vat: “No demî de ez navenda polîsan gêrîyaya, min înan ra vat ke banê ma veşîyeno la qet xemê înan nêbî, peynî min zî îtfaîye gêrîya û îtfaîye zî vat ke polîsan destûr înan ra nêdanî, eke ma serxo bêrî, polîsan do ser ma gule verabidî.”
Dîlek ard ziwan ke îtfaîye peynî adir hewn ra berd la polîsan wezîfedarê îtfaîyeye bi guleyan birîndar kerd, tîmê taybet hewl dayî ke malbatê ci qetil bikerî, yanî bi aşkera dewlet waşt ke înan bi doman û heme malbatê înan bi ganî biveşna, bi hetkarîya ciranê xo, ê adirî ra xelisyayî.
Banê ci heme veşîyayo
Dîlek aşkera kerd ke peynî domanê xo veradayî merdîwanan, ey û hemcenîya ci hewl dayî ke adir hewna ra berî la ê nêeşkîyayî netîce bigêrî.
Dilek ciresna ke peynî adir bi pêrorîya banê kewt, ê hetkarî ciranê xo waştî û wina vat: “Min bi hetkarîya ciranan, doman û birayê xo derbasî banê ciran kerd û peynî ez û hemcenîya xo, ma pîya şîyê hetê înan. Peynî zî min navenda polîsan gêrîya û min vat; tîmê taybet banê min veşnayî. Navenda polîsan ra zî min ra vatî; nêzdê banê to ‘terorîst’ estî. Min zî vat; belê destûr bidî îtfaîyeye bivîyarê la destûr nêdayî, no ser zî banê min veşîya. Êdî çew dewlet nêwazena.”