Parlamenter û îdarekarê HDPyî zî tede xeylê kesan waşt vernîya Zîndanê Amedî de bi îzehetêko nuştekî destek bidî çalakîya Leyla Guvene, labelê polîsan destûr nêda sîyasetmedaran.

Rayberê Şarê Kurdî Abdullah Ocalan binê tecrîdêko giran de yo û nizdîyê 3 serrî yo ke ti xebere tira nîna girewtene. Vera tecrîd û îzolasyonî de çalakîyê tewir bi tewirî yenî viraştene. Nînan ra yewe zî çalakîya Parlamentera HDPyî ya Colemêrgî û Hemsereka Kongreya Komelê Demokratîke (KCD) Leyla Guvene ya.

Guvene 8ê teşrîna peyêne de seba ke bale bianco tecrîdî ser, dest bi grevê vêşanîye kerde. Çalakîya grevê vêşanîye ya Guvene roja 10. de dewam kena. Her ke şono çalakîya Guvene rê destekî zêde benî. Amed de mîyanê înan de parlamenterê HDPyî Salîha Aydenîze, Dersîm Dage, Remzîye Tosune, Musa Farisogullari, Tuma Çelîk, Berdan Ozturk û îdarekarê HDPyî zî tede xeylê kesan seba ke destek bidî çalakîya grevê vêşanîye, waştî vernîya Zîndanê Tîpa E yê Amedî de îzehetêko nuştekî bidî.

Labelê vizêr saeteanê serê sibayî de polîsan dormeyê awanîya partîye girewt û destûr nêda ke parlamenterî şêrî zîndanî ver. Mabênê polîs û girse de munaqeşe vejîya. Parlamenteran vernîya awanîye de îzehetêk da. Parlamenteran ra Salîha Aydenîze dîyar kerde ke polîsan cinîyî tacîz kerdî û reaksîyon nîşan daye.

Ma vera faşîzmî de sere nêronenî

Aydenîze va ‘heqê ma yê demokratîkî yenî astengkerdene û no bi hawayo aşkere suc o’ û wina dewam kerde: “Şexsê Ocalanî de heme Rojhelato Mîyanên binê tecrîdî de yo. Ma qerar girewtbî ke Amed, Wan, Colemêrg, Edene û Riha de çalakîyan bivirazî û destek bidî Leyla Guvene. Labelê walîyê Amedî qedexe kerd. Labelê ma do çalakîyanê xo bidomnî. Kilîtê çareserîye Îmrali de yo. Senî ke Seyîd Riza û embazanê ci sere nêrona, ma zî do vera faşîzmî de sere nêronî.”

Bi xoverdayîşî aştî û demokrasî yenî

Endama Dîvanê Hemserekîya KCDyî Mekîye Guzele û Parlamentera HDPyî ya Amedî Remzîye Tosune qisey kerdî. Ancax bi xoverdayîşî aştî û demokrasî yenî. Ma kurdî aştî, demokrasî û edalet wazenî. Cok ra ganî tecrîd demêko raver bêro wedarnayene. Ma mehkeme ra edalet nêpawenî. Eke raşta zî Tirkîya de edalet bibîyêne, ganî Leyla Guvene rewna biameyêne tehlîyekerdene. Goreyê qanûnî eke hemwelatîyêk bibo/a parlamenter, ganî mehkemebîyayîşê aye bêro vindarnayene. Guvene seba ke aştîye waştêne ameye tewqîfbîyayene. Parlamenterê CHPyî Enîs Berberoglu tehlîye bi, labelê Guvene veranêdîyaye.”

Ganî merdim tecrîd ra dest pêbikero

Guzele da zanayene ke Guvene seba xo nê, seba ke tecrîd bêro wedarnayene, dest bi grevî kerdo û wina dewam kerd: “Eke ma dest bi protestokerdişê Tirkîya bikerî, ganî ma ewil tecrîd ra dest pêbikerî. Çimkî heme girêdayeyê yewbînan î. Anketê ke yenî viraştene de yeno dîyayene ke nîsbetê waştişê aştîye berz beno. Eke Tirkîya de aştîyêk bêro viraştene, o wext do tesîrê domîno bibo û vernîya aştîya Rojhelato Mîyanênî biabo. Labelê tayê ci nêwaştî aştîye bibo. Ma do seba ke hişyar bikerî 5 cayanê cîyayan de grev bidî dest pêkerdene. Eke çîyêk nêro kerdene, do grevî dewam bikerî. Xoverdayîş ra teber, sewbîna çîyêk destê ma de çin o. Ancax bi xoverdayîşî aştî û demokrasî yenî. Ma kurdî aştî, demokrasî û edalet wazenî. Cok ra ganî tecrîd demêko raver bêro wedarnayene.”

Ma heta peynî hetê Guvene de yî

Parlamentere Tosune zî dîyar kerde ke ê wayîrê çalakîya Guvene vejîyenî û wina va: “Ma heta peynî hetê Guvene de yî. Guvene seba waştişê xo yê şexsî dest bi grevî nêkerd. Cok ra ma destek danî waştişê aye. Rêxistina Bajarê Amedî yê HDPyî seba ke destek bido çalakîya Guvene, do qasê 2 rojan grev bido dest pêkerdene. Ez veng dana şarê ma ke wa şarê ma destek bido çalakîye.”

 

AMED