FERHAT ÇELÎK / MA / STENBOL
Kampanyaya îmzeyan ke xeylê cayanê Ewropa de seba azadbîyayîşê Rayberê Şarê Kurdî Abdullah Ocalanî û destekdayîşê grevê vêşanîye dîyaybî destpêkerdene, dewam kena. Tewr peynî 51 roşinvîr û nuştoxanê ke demanê cîyayan de Xelata Nobelî girewtbî destek daybî kampanya.
Koordînasyonê Grevê Vêşanîye ke hetê HDPyî ra amebî awankerdene zî destek dana kampanya û heta nika xeylê pêvînayîşî kerdî. Hetkarê Hemserekîya HDPyî Azad Barişî babete ser o qisey kerd.
Barişî bêvengîya ke esta rexne kerd û wina va: “Grevî her roje pîl benî û temaşekerdişê grevan zerrîya merdimî dejneno. Cok ra ma çarçewaya kampanya de xeylê kesanê wayîrwjdanan reyde pêvînayîşî viraştî. Kampanya de azadîya Ocalanî yena waştene. Kesanê ke îmza kerdî, no het de mesaj dayo dinya. Nê kesê roşinvîrî baş zanî ke ancax Ocalan eşkeno nê şîyayîşî bivindarno. Demanê peyênan de xeylê eserê Ocalanî açarîyayî xeylê ziwananê bînan. Nê eserî unîversîteyan de sey dersî yenî dayene.”
Kampanya do dewam bikera
Barişî va ‘na kampanya do bi hîrabîyayîş dewam bikero’ û wina dewam kerd: “Hem Tirkîya de û hem zî dinya de hêzê demokratîke, hunermend, roşnvîr û kesê ke wayîrê wijdanî yî do beşdarê na kampanya bibî. Ewro komelêk bi temamî binê tecrîdî de yo û heta ke no tecrîd nêwedarîyo, ma do kampanyaya xo bidomnî. Heta ke ma dest ra bêro, ma do kampanya hîra bikerî.”