HABIBE EREN-DUYGU EROL/ANQARA-ŞÛJIN
Çalakîya grevê vêşanî ya Nurîye Gulmene û Semîh Ozakçayî ke seba tepîya agêrayîşê karê xo daybî destpêkerdiş, roja 161. de dewam kena. Qerarê AÎHMî ra dima Nurîye û Semîh zîndan ra sewqê Nêweşxaneyê Kampusî yê Zîndanî bîbî.
Seba ke çalakgerî nêşînayêne bi tena sereyê xo lazimîyanê xo pê bîyarî, qayîtkerdox (seba refaqatî) waştbîy. Badê israrê çalakger, avûkat û keyeyanê çalakgeran waştişê înan yê qayîtkerdoxî ame qebulkerdiş. Nika do waya Nurîye Beyza Gulmene û dayîka Semîhî Sultan Ozakça sey qayîtkerdox şêrî hetê xoverdakaran.
Babete ser o Waya Nurîye Gulmene Beyza Gulmene qisey kerde. Beyza Gulmene bale ante ser qerarê AÎHMî ke vatbî ‘tehlukeyê mergî esto, nêşêna tena bi sereyê xo bimano, labelê ganî tewqîbîyayîşê ci nêro taloqkerdiş’ û wina domnaye: “No çîyêko senîn o? Wazenî vajî ke ‘eşkeno biremo’. Ê nêşênî karê xo daxî bi xo bikerî. Nê merdimî do biremî kura? Ma heme zî zanî ke ganî tehlîye bibîy. Labelê seba ke tehlîye nêbîy, çimê xo tewqîfbîyayîşê înan rê gênî.”
Çimê înan de weş kenî
Gulmene dewamê qiseykerdişê xo de va ‘wazenî xo çimê AÎHMî de şêrîn binawnî’ û wina dewam kerde: “Sey înan ra baş ewnîyenî, xo nîşan danî. Nivîna hewayin û sewbîna çîyan danî, labelê bado ke AÎHMî muracatê tedbîrî red kerd, şewêk de bi zorî înan remnayî. Ma prosesê nêweşxane de fam kerd ke ê wazenî nê karî biqedênî. Seba ke bi zorî mudaxale bikerî, berdî nêweşxane. Nêweşxane de ma nêşîna pêvînayîşo akerde bikerî. Her çiqas ke saetêk heqê ma bî, ma nîme saete pêvînayîş kerd û gardîyanî ma goşdarî kerdêne. “
Ma di hewte mijul kerdî
Gulmene qala pêvînayîşê xo û doktoran kerde û wina va: “Badê ke Nurîye û Semîh berdî nêweşxane, ma waştişname da. Heta nika ma nêşîna xo biresnî dozgerêk. Ma ra rapor waştî, dima ra raporê Nêweşxaneyê Zîndanî waştî, ma ê zî da. Labelê na rey zî dîyar kerdî ke ê do heyetêk awan bikerî. Bi no hawa 2 hewte ma mijul kerdî. Wexto ke ma doktoran reyde pêvînayîş kerd, doktoran va ‘ganî şima înan îkna bikerî ke ma bi zorî mudaxale nêkerî’. Yanî doktoran ma tehdît kerd. Badê xeylê israran de waştişê ma yê qayîtkerdoxî qebul kerdî. Ma do ewja de vîstanê weşan derbaz bikerî. Ez do hetkarî bida. ”
Heto bîn ra wexto ke her di perwerdekarî ameybî tepiştiş, Esra Ozakçaye zî aşkere kerdbî ke ya zî grevê vêşanî dana destpêkerdiş. Grevê Esraye nika roja 86. de dewam keno. Esra nika 48 kîlo menda.