Dimayê îbatekê ra bigî heta dimayê serkewtişê şoreşêke, dimayê destkewtişêke ra bigî heta destpêka bûyerêke rocê kêf û şahî bi nameyê roşanî ameyê kerdişî. Wateya tewr muhîm e yê roşanan ena ke malbatî, şarî yan zî miletî hered, kîn, nefret û şerrê ke mîyanberê înan de virazyayo wedarê, li werê bêrê û ay rocî goreyê wateyê ey bi kêf û şahî derbas bikerê.
Kurdî zî mîyanê neteweyanê dinya de hem roşananê dînî hem zî yê kulturî û netewî pîroz kenê. Roşanê remezanî û yê qurbanan, yê çarşema sor û yê newrozî bi girseyî yenê pîrozkerdiş. La roco ke dagirkeran welatê ma dagir kerd heta rocê eyroyî zehf rayan înan ay roşanî ro şarê ma kerdî rocê sîyayî. Kurdî her gamî dagirkeranê ke xo zey wayîr û rayveberê welatê înan vînenê ra wazenê ke goreyê wateyê roşanan tê bigeyrê û zilmê xo ra fek vera bidê la ay dagirkerê ke xo zey mislimanan ramojnenê her hewe de zidê roşanan tê geyrenê û her awayî zilmê xo kurdan ser de domnenê û ay zilmê xo rê cîya cîya qilifan vînenê.
Roşanê remezanî ke roşanêke bawerîya Îslamîyetî yo ke dimayê îradeyê nefsî û wayîr ro vetişê feqîran ke aşmêke ameyo dayîşî yeno pîrozkerdişî emsar zî mîyanê hîri rocan de ame pîrozkerdişî. La dagirkeran ancî nêverda ke şarê ma roşanê xo goreyê wateyê ey pîroz bikero. Kurdan zî waştêne ke sey her mislimanêke dimayê îbadetê xo roşanê xo yê ke Homayî înan rê bexş kerdo, goreyê wateyê ey bi kêfweşî bi aştî pîroz bikerê, la dagirkeranê zaliman û DAIŞanê hovan ke Muawîyeyê enî zemanî yê, bi zilmê xo yê bêemanî nêverda ke şarê kurd roşanê xo bi zerre weşî pîroz bikerê.
Kurdan emsar bi êşê qirkerdişê mitîngê Amedî û qirkerdişê Kobanê roşanê remezanî bi xemgînî û zerreşikte derbas kerd, la ay tenê ke semedê mislimanê welatê bînan û mezlûmanê welatê bînan hesranê xo kenê war û barre barre kenê, ayêke qalê wateya roşananê îslamîyetî kenê hemverê zilmê ke kurdan ser de ame kerdişî bê veng mendî û goşdarîya enî êşê kurdan kerde.
Û ancî rayedar û girregirê dewlete ke xo zey wayîr û rayedarê welatê ma vînenê û mislimanê ke xo bawermend û dîndar vînenê hemverê xozaya welatê ma zî rikê xo mocnenê ra û ma eno awa bi awayêke eşkera veşnayîşê daristanê koyê Cudî de dî ke wexta mijare kurd û Kurdistan bê çiqas merdimahî û îslamîyet ra dûrî kewnê. Gezî de kurdan semedê hebêke dare şarê tirkî bertekê xo mot ra, la şarê tirkî hemverê koyêke kurdan ê zey Cudî ke tede bi hezaran giyanwerî veyşayî bê veng mendî. Ne heywanheskerdan ra, ne xozahezkerdan ra, ne derdorheskerdan ra û hemine ra muhîm ne zî ayê ke xo wayîr û rayveber vînenê yanê erkananê dewletî ra veng vecîya. Mijare şarê ma û welatê ma de her kes sifatê xo yê ke dayê xo ya danê kiştêke û kewenî rolê hîri meymûnan.
Nesrîn NAVDAR