Dewijê ke herêma Colemêrgî de heywananê şenikan miqate kenî, bi ameyîşê wisarî kişta Çemê Zapî de bica bîybî. Dewijî bi germbîyayîşê hewayî nika zî vera xo dayî zozanan û heywananê xo berî cayanê berzan. Dewijî goreyê serranê verênan aşmêk erey şonî zozanan.
Dewijî seba ke wesayît nêşono, bi estor û kantiran kel-melanê xo kirişenî zozanan. Dewijî kel-melanê xo kirişenî, şivaneyî zî heywanan berdî û resayî zozanan. Dewijan ra Garîp Beyterî va ‘ma aşman ra ver şîyî herêma Ulebe û ewro zî ma şînî zozanan’ û wina domna: “Ma badê ke kel-melê xo berd, ma yenî hetkarîya şivaneyan zî kenî.”
Rojhat Beyterî zî va ‘emser serrêka zehmetine ya’ û wina dewam kerd: “Seba ke zimistanî zaf vewre varaye û wisarî varan tay bi, vaş qet çin o. Coka kerdişê karê heywanan zî zehmetin o. Ma do emser tena 3 aşmî heywanan miqate bikerî û pê îdare bikerî.”
Xelasîye ancax tebîetî reyde bena
Dewijan ra Naîf Beyterî zî va ‘nê koyan bi seserran înan miqate kerdo’ û wina domna: “Coka ganî merdimî ewro peya xo nêdî nê koyan. Emser wisarî zaf ziwa vîyart. Çimkî varayîşî nêbî. Coka vaş tay o û herême d kesê ke karê zîret û heywankarîye kenî, bîyî mexdûr. Wa şarê ma wayîrê dewe û zozananê xo bivejîyo. Xelasîya ma ancax tebîetî reyde bena.”
MA / COLEMÊRG