Kurdê ke Almanya de ciwîyenê verra tecrîd, qeyûm û hewldayenê îşgal yê dewleta tirk Almanya de vejyenê meydanan. NAV-DEM seba rayşîyayiş û mitîngan vengê tewrbîyayenê da.
Navendê Civaka Kurd ya Demokratîk yê Almanya bi damûstayîneke nuşteyî aşkere kerd ke dûştê tecrîdê ser Rayverê Şarê Kurd Abdullah Ocalan, hurendîya şaredarîyanê DBP de tayînkerdişê qeyûm û verra hewldayenê îşgal yê dewleta tirk vejyenê meydanan. Aşkereyê nuşteyî de vajîya ke dûştê derbeya qeyûm yê hikûmeta AKP ke vera şaredarîyanê kurd yê ke bi reyanê mîlyonan amey weçînayen de ganî kurd û dostê ci yê ke Almanya de ciwhiyenê meydanan de bê. NAV-DEM aşkere kerd ke ewro faşîzma AKP-Erdogan polîtîkaya antî-kurd de heq, hiqûq û exlaqî de sînoran nêsilasnena û wina va: “Tecrîdê ser Rayverê Şarê Kurd Abdullah Ocalanî ra paralel hewldayenê îşgalê Rojawa ramito û bi destê qeyûman dest ronayo şaredarîyê demokratîk û rewa ser. Sûr, Cizîr, Nisêbîn, Şirnex, Licê, Gever ra pîya cayê ke bi seyan sivîlan weşîya xo kerdî vinî, serragêra derbeya 12ê Îlone de bi destê AKP derbe virazîya û dest nay şaredariyan ser.”
Ganî şar wayrê îradeyê xo bivejyo
Damûstayîna nuşteyî de vajîya ke no kerdeno ke îradeyê weçîntoxan çinî hesibneno seba ma hikmê ci çinîyo. NAV-DEM waşt ke şar yê ke hurendîya weçîntoxan yenê tayînkerden nêsilasnê, wayrê îrade û mewzîyanê (meterîs) xo bivejyê. Damûstayîn de vajîya ke ganî ma bidê damûsnayen ke dûştê dîktatorîya Erdoganî de teslîm nêbenime, milê xo çewt nêkeme, na bêhiqûqîn qebûl nêkeme. NAV-DEM veng da Kurdistanijê ke Awrûpa de ciwîyenê û dostanê ci ke dûştê faşîzmî û qirkerdişanê ci bibê jû û tekoşîna xo berz bikerê. NAV-DEM herzewbîn veng da Konseyê Awrûpa, Jûbîyena Awrûpa, Neteweyê Jûbîyayî ke verra dîktatorîya Erdogan û Tirkîye bikewê hereket.
Teqwîmê rayşîyayiş û mitînganê Almanya wina yo:
Navendê Civaka Kurd ya Demokratîk yê Almanya damûstayîn de da zonayen ke 17ê Îlone ra tepîya Almanya de xêlê eyaletan de nûmayişan virazena û vengê tewrbîyayenî da.
* Berlîn de ewro seat 18.00 de Hermann Platz Neukoln de rayşîyayiş û mitîng virazîyeno.
* Kassel de ewro seat 16.00 de ver posteqane de rayşîyayiş û mitîng virazîyeno.
* Hambûrg de ewro seat 12.00 de Rathausmarkt de bi çepanê Almanan ra pîya şîyayişeke wertex virazîyeno.
* Stûttgart de ewro seat 16.30 ra tepya Lautenschlagerstrase de rayşîyayiş û mitîng virazîyeno.
* Mannheim de ewro seat 14.00 de Hauptbahnhof de mitîng virazîyeno.
* Oldenbûrg de ewro seat 14:00 de Hauptbahnhof de rayşîyayiş û mitîng virazîyeno.
* Koln de ewro seat 12.00 de Deutzer Werft de bi Sendîqaya Almanan ra pîya rayşîyayiş virazîyeno.
* Frankfûrt de ewro seat 16.30 de Kaîser Sack de rayşîyayiş û mitîng virazîyeno.
* Dortmûnd de ewro seat 14.00 de Cine Star de rayşîyayiş û mitîng virazîyeno. n
ANF / NAVENDÊ XEBERAN