DENÎZ ÎKE / ANF / AMED
Xoverdayoxanê zîndanî ra Naîme Çelîka ke 1ê Adare de tewrê grevê vêşanîye yê ke rayberîya Leyla Guvene de semedê wedartişê tecrîdê serê Rayberê Şarê Kurdî Abdullah Ocalanî ameyî destpêkerdene bîyî, dimayo ke 28ê Adare de ameye tehlîyekerdene çalakîya xo teber de da domnayene. Çelîka ke 87 rojî grevê vêşanîye de mend û dimayê vengdayîşê Ocalanî 26ê Gulane de çalakîya xo qedîna û nêwaşxane de ameye tedawîkerdene xoverdayîşê grevê vêşanîye û mesajê Ocalanî ercnayî.
Çelîke sere de bale ante xoverdayîşê dayîkanê laçigsipîyan ser û wina va: “Mîmarê nê serkewtişî dayîkê ke tim meydanan de bî ê yê. Vera prosesî reaksîyonî kewtî erey coka dayîkî vejîyayî meydanan. Rixmê heme hêrişan her tim kuçeyan de bî. Heme cinîyê ke vera bêvengîye sebirê înan nêmend wayîrê çalakîya ma vejîyayî û weriştê lingan ser. Werrekna hende erey mekewtêne. Hema ke 8 embazanê ma xo feda nêkerd û rewşa xoverdayoxan xidar nêbîbî biweriştêne lingan ser. Çi heyf o ke no nêbi. Çalakî zaf kerde derg. Çalakîye ra dima embazanê ma de problemê mendeyî virazîyayî. Ma ser kewtî, no serkewtişêk o. La ewro ra tepîya şarê ma senî wayîr nê destkewteyan vejîyeno no muhîm o. Destkewteyê ke bi bedelanê girdan ameyî qezençkerdene, ganî înan rê wayîr bêro vejîyayene.”
Çelîke da zanayene ke mesajê Ocalanî semedê heme şaran umîd o û manaya ci gird a û qiseykerdişê xo wina qedîna: “Zerrîya Birêz Ocalanî karekterêko gird o. Ma zanê ke lemêkê gijê hemrayê ey birişîyo o naye ra dejeno. Ocalan goreyê şaran û hemrayanê xo no qerar girewt. Mesajê ci bi silamkerdişê xoverdayoxan dest pêkerd û qerarê qedînayîşê çalakîye çalakgêran rê verda. O zano ke no xoverdayîşê ma pêrûne yo. Ma zî bi sebebo ke ey ra bawer kenê ma çalakîye qedînaye.”